აშშ-ს პრეზიდენტმა დონალდ ტრამპმა უკრაინაში არსებული კრიზისის გამო რუსეთისთვის დაწესებული სანქციები ერთი წლით გაახანგრძლივა. ამის შესახებ ნათქვამია თეთრი სახლის მიერ გამოქვეყნებულ განცხადებაში.

 

„აღნიშნულ განკარგულებებში მოცემული ქმედებები და პოლიტიკა კვლავ წარმოადგენს საფრთხეს აშშ-ს ეროვნული უსაფრთხოებისა და საგარეო პოლიტიკის ინტერესებისთვის. ამიტომაც, ერთი წლით ვახანგრძლივებ სასანქციო რეჟიმის დებულებებს, რომელიც #13660 განკარგულებაშია მოცემული“, – ნათქვამია დონალდ ტრამპის მიერ ხელმოწერილ განმარტებით ბარათში.

 

საუბარია რუსეთისთვის დაწესებულ შემზღუდავ ზომებზე, რომელიც დაწესებული იყო 2018 წლის 20 სექტემბერს და 2014 წლის 6 მარტს, 16 მარტს, 20 მარტს და 19 დეკემბერს ყირიმში არსებული ვითარების გამო.

 

„იმ პირების ქმედებები და პოლიტიკა, რომლებიც ძირს უთხრიან უკრაინაში დემოკრატიულ პროცესებსა და ინსტიტუტებს, საფრთხეს უქმნიან უკრაინის უსაფრთხოებას, სტაბილურობას, სუვერენიტეტსა და ტერიტორიულ მთლიანობას“, – აღნიშნავენ თეთრ სახლში.