საქართველოს პარლამენტში პრემიერ-მინისტრის სპეციალურ წარმომადგენელს რუსეთთან ურთიერთობის საკითხებში ზურაბ აბაშიძეს უსმენენ. როგორც ცნობილია პრაღაში გამგზავრებამდე ზურაბ აბაშიძემ კონსულტაციები გაიარა ბიძინა ივანიშვილთან. ასანიშნავია, რომ ივანიშვილი პარტიის თავმჯდომარეა და ის არ უნდა ერეოდეს ამ ფორმატის მოლაპარაკებაში.
შეხვედრის დაწყებამდე აბაშიძემ აღნიშნულ საკითხზე კომენტარი გააკეთა:
„არ ვიცოდი თუ არ შეიძლებოდა შეხვედრა და ვინ აკრძალა, რატომ აკრძალა ესეც დღემდე ვერ გავარკვიე. ბატონი ბიძინა, როგორც მმართველი პარტიის თავმჯდომარე აუცილებლად უნდა იყოს საქმის კურსში როგორ მიმდინარეობს ეს ფორმატი. მით უმეტეს მის დროს შეიქმნა. მე მას შევთავაზე რომ მიმეწოდებინა ინფორმაცია. ასე, რომ იყო ინფორმაციული სახის შეხვედრა. ის მუქარის შემცველი კომენტარები რაც გაკეთდა იმ დღეს ბატონი კარასინის მიერ, თავდაცვის მინისტრის მიერ არის აბსოლუტურად მიუღებელი. ეს ჩვენი აზრით უპირველეს ყოვლისა რუსეთის საერთაშორისო ავტორიტეტს უყენებს ზიანს,“-განაცხადა ზურაბ აბაშიძემ.
კითხვაზე შეხვედრა თუ არა ბიძინა ივანიშვილს მას შემდეგ, რაც ის პრაღიდან დაბრუნდა, აბაშიძემ განაცხადა, რომ არ შეხვედრია:
„აღარ მქონია შეხვედრა მაგრამ სიამოვნებით შევხვდები. მე მასთან მაქვს ძალიან კარგი პირადი დამოკიდებულება. ყოველთვის ვხვდებოდი და სიამოვნებით შევხვდები მომავალშიც. მე პარტიულობის გამო არ დავუნიშნივარ ამ თანამდებობაზე,“-განაცხადა ზურაბ აბაშიძემ.