საფრანგეთის ქალაქ არლში  ვინსენტ ვან გოგის  მუზეუმში ნიკო ფიროსმანის ნამუშევრების გამოფენს გაიხსნა.

 

კულტურის სამინისტროს ინფორმაციით, ექსპოზიციაზე  წარმოდგენილია ფიროსმანის 29 ტილო  ვან გოგის 6 ნამუშევარი შალვა ამირანაშვილის სახელობის ხელოვნების მუზეუმის კოლექციიდან, ეს არის პირველი შემთხვევა, როდესაც ქართველი მხატვრისა და ვინსენტ ვან გოგის ნამუშევრები ერთ სივრცეშია გამოფენილი.

 

 

გამოფენა საქართველოს განათლების, მეცნიერების, კულტურისა და სპორტის სამინისტროს, საქართველოს ეროვნული მუზეუმის, Infinitart Foundation Vienna და არლში ვინსენტ ვან გოგის მუზეუმის ინიციატივით ხორციელდება და მის ფარგლებში თანამედროვე ხელოვნების სივრცე, მხატვრის შემოქმედებით შთაგონებულ, თანამედროვე არტისტთა ნამუშევრებს ეთმობა. მათ შორის გამოფენილია  პარიზის ზდანევიჩის ფონდში დაცული ილია ზდანევიჩის ხელნაკეთი წიგნი, სახელწოდებით „ფიროსმანაშვილი 1914", რომელშიც  შესულია პაბლო პიკასოს მიერ შესრულებული გრავიურა „ფიროსმანის პორტრეტი“, ცნობილი იაპონელი არქიტექტორის, ტადაო ანდოს მიერ სპეციალურად შექმნილი მაგიდა, სახელწოდებით Table Of Pirosmani, რომელიც იაპონელმა არტისტმა ფიროსმანაშვილის ხსოვნას მიუძღვნა. დამთვალიერებელი აგრეთვე იხილავს ჯორჯ ბაზელიცის, იოში მოტონარას, ანდრო ვეკუას, შირანა შაბაზის, კრისტინა ფორერის, ადრიან გენისა და რაფაელა ვოგელის ნამუშევრებს.

 

მუზეუმი გამოფენას 1 ივნისის ჩათვლით უმასპინძლებს

 

 

ექსპოზიციის გახსნას  მიწვეულ სტუმრებთან ერთად განათლების, მეცნიერების, კულტურისა და სპორტის მინისტრის პირველი მოადგილე მიხეილ გიორგაძე, საქართველოს ეროვნული მუზეუმის დირექტორი დავით ლორთქიფანიძე და ვინსენტ ვან გოგის ფონდის სამხატვრო ხელმძღვანელი ბიჩე ქურიგა ესწრებოდნენ.