ზუგდიდის ისტორიულ მუზეუმში ჭერი ჩამოინგრა და ჭურჭლის ნაწილი დაზიანდა. ზუგდიდის მუზეუმის დირექტორის ლილი ბერაიას თქმით, ჭერის ნაწილი იმ დარბაზში ჩამოინგრა, სადაც დადიანების ჭურჭელია გამოფენილი: „დაზიანდა რამდენიმე ექსპონატი და თან ისეთები, რომლებიც რესტავრაციას ექვემდებარება…გზაში არიან რესტავრატორები და გააკეთებენ“-განუცხადა „ოდიშინიუსს“ ლილი ბერაიამ. მისი თქმით, ძეგლს დაცვა და მოვლა ჭირდება და ჭერის ჩამონგრევაც სწორედ იმიტომ მოხდა, რომ სასახლე არის ამორტიზებული „დღეს რომ ჭერი ჩამოინგრა, ეს იმის შედეგია,ღონისძიებებს აკეთებენ და დინამიკებს რომ დგამენ, აი, ზუსტად ასეთი რყევის გამო მოხდა ეს. ასეთი ძეგლის ახლომახლო არაფრით არ შეიძლება მსგავსი ღონისძიებების ჩატარება“- განაცხადა ლილი ბერაიამ. ეკატერინეს სასახლეს რეკონსტრუქცია მისივე თქმით, აპრილში ჩაუტარდება.