შეწყალების კომისიის ყოფილი თავმჯდომარე, ზვიად ქორიძე გამოეხმაურა ე.წ ციანიდის საქმეზე მსჯავრდებული დეკანოზის შეწყალების საკითხზე მიტროპოლიტ დანიელის მიერ გაკეთებულ განცხადებას, იმასთან დაკავშირებით, რომ მარგველაშვილს გიორგი მამალაძის შეწყალების სურვილი ქონდა, ამის წინააღმდეგი არც საპატრიარქო იყო, თუმცა ხელისუფლების ჩარევით ეს შეწყალება ჩაიშალა. ქორიძის თქმით, ამ საკითხზე თავად კომისიის წევრები ვერ შეთანხმდნენ:
„მაშინ პირადად ჩემი ინიციტივით განსაკუთრებული გარემოებით კომისიის სხდომაზე გავიტანეთ ეს საქმე. დებულება, როგორც ითვალისწინებდა, რომ კომისიის ყველა წევრს დადებითი პასუხი უნდა გაეცა, ანუ, კონსესუსით მიგვეღო გადაწყვეტილება, რომ პრეზიდენტისთვის შეგვეთავაზებინა რეკომენდაცია, ვერ მოხერხდა იმ ეტაპზე.
მაშინ პრეზიდენტმა გაიზიარა კომისიის ეს დამოკიდებულება და მას შეწყალების ექსკლუზიური უფლება არ გამოუყენებია. მე ძალიან ბევრჯერ მქონდა საუბარი ამაზე მარგველაშვილთან და არასოდეს ამ საუბრის დროს არ ყოფილა რაიმე მინიშნებაც კი, რომ მთავრობასთან ამ თემაზე მიდიოდა კონსულტაციები“ – განაცხადა ზვიად ქორიძემ.