საჯარო სამსახურში შესაძლოა, იმ პირთა დასაქმება შეიზღუდოს, რომლებსაც სავალდებულო სამხედრო სამსახური გავლილი არ აქვთ.
ამავდროულად მკაცრდება სამსახურში გაწვევის გადავადების მიზეზები. იმ შემთხვევაში, თუ კანონით გათვალისწინებული სასწავლო სემესტრების რაოდენობა ამოწურული იქნება, სტუდენტის სტატუსი ვეღარ გახდება სამხედრო სამსახურიდან თავის არიდების საფუძველი.
ასევე, კანონპროექტის მიხედვით, სამხედრო სამსახურიდან ვადამდე დათხოვნის შემთხვევაში, სამხედრო მოსამსახურე ჩაირიცხება რეზერვში.
საკანონმდებლო წინადადება, რომელიც მალე პარლამენტში დარეგისტრირდება, ინფრასტრუქტურის სამინისტრომ მოამზადა. ინიციატივა ოპოზიციის მხრიდან მავნებლურ იდეად შეფასდა.
„არასწორი და მავნებლური იდეა, ვის დაებადა ეს იდეა თავში, ძნელი წარმოსადგენია, თუმცა ამ ხელისუფლებისგან უკვე აღარაფერი გვიკვირს. დარწმუნებული ვარ, ამას ხალხის დიდი გამოხმაურება მოჰყვება. ჩვენ ყველაფერს გავაკეთებთ იმისთვის, რომ ეს მავნებლური იდეა არ განხორციელდეს,“ – აცხადებს „ნაციონალური მოძრაობის“ ერთ-ერთი ლიდერი გიორგი ბარამიძე.
„ევროპულ საქართველოში“ კი აცხადებენ, რომ აუცილებელია, ქვეყანამ მიიღოს ამერიკული მოდელი, რაც საკონტრაქტო სამსახურს გულისხმობს და ადამიანები სამხედრო სამსახურში ძალით არ უნდა წაიყვანონ.
„ჩვენ ვთვლით, რომ ადამიანები ძალით არ უნდა წაიყვანო ჯარში, თვითონ უნდა ჰქონდეს ამის სურვილი, ამიტომ საკონტრაქტო პრინციპი არის სწორი, რაც არის ამერიკული პრინციპი,“ – ამბობს ოთარ კახიძე.