ეროვნული ბანკის მიერ „თიბისი ბანკის“ დამფუძნებლების, მამუკა ხაზარაძის და ბადრი ჯაფარიძის ხელმოწერის უფლების შეჩერება და სამეთვალყურეო საბჭოდან გაწვევის მოთხოვნას ოპოზიცია ზეწოლად აფასებს.
„ნაციონალური მოძრაობის“ ერთ-ერთი ლიდერი, რომან გოცირიძე ამბობს, რომ აშკარაა ბიზნესზე ღია ზეწოლა, რაც ქვეყნის ეკონომიკურ სტაბილურობას პირდაპირ საფრთხეს უქმნის.
გოცირიძე დარწმუნებულია, რომ აქ ბიზნესის წილების გაყოფის საკითხი და ანაკლიის პორტის პროექტია მთავარი პრობლემა და არაფერ შუაშია სამართლებრივი დავა, რომელიც მამუკა ხაზარაძის წინააღმდეგ მიმდინარეობს. ენმ-ს წევრის განცხადებით, ხაზარაძეს წილის დათმობას ბიძინა ივანიშვილი სთხოვდა.
დეპუტატი თვლის, რომ ბიზნესმენებმა უკან არ უნდა დაიხიონ, არ უნდა დათანხმდნენ არანაირ გარიგებას და მათ სამართლებრივი დავა ბოლომდე უნდა მიიყვანონ.
მამუკა ხაზარაძემ ეროვნული ბანკის მოთხოვნის საპასუხოდ განცხადება გაავრცელა, სადაც ხაზარაძე ამბობს, რომ რომ ეროვნულმა ბანკმა თავისი ბრძანებით დააგვირგვინა ის რეპუტაციის შემლახველი კამპანია, რომელიც მისი, ბადრი ჯაფარიძისა და "თიბისის" წინააღმდეგ დიდი ხანია გრძელდება.
რაც შეეხება დაწყებულ გამოძიებას ფულის შესაძლო გათეთრების შესახებ, ბანკის დამფუძნებელი ამბობს, რომ საკითხი ჯერ კიდევ 11 თვის წინ გავლენიანმა იურიდიულმა კომპანიამ შეისწავლა და დაადგინა, რომ არა თუ ფულის გათეთრებას, თანამდებობის ბოროტად გამოყენებას ან რაიმე კრიმინალურ ქმედებას, არამედ ინტერესთა კონფლიქტსაც კი არ ჰქონია ადგილი.
მამუკა ხაზარაძე უსამართლობასთან შეგუებას არ აპირებს და "თიბისის" ინტერესების დაცვას სამართლებრივად გეგმავს.