მოქალაქეთა საინიციატივო ჯგუფი „დატოვე პარლამენტი ქუთაისში“, სადაც ადგილობრივი სამოქალაქო აქტივისტები და საზოგადოების სხვადასხვა სფეროს წარმომადგენლები არიან გაწევრიანებული, ცენტრალურ ხელისუფლებას იმ პოლიტიკისკენ გადახედვისკენ მოუწოდებს, რომელსაც რეგიონების მიმართ იჩენენ ბოლო პერიოდში.
საინიციატივო ჯგუფის ერთ-ერთი წარმომადგენლის, ხვიჩა ვაშაყმაძის თქმით, ქუთაისში პარლამენტის შენობის ბედი არავის აღელვებს და ამ დრომდე ხელისუფლების სხვადასხვა შტოს წარმომადგენლები ურთიერთგამომრიცხავ განცხადებებს აკეთებენ.
რამდენიმე დღის წინ ქუთაისში მყოფმა საქართველოს პრეზიდენტმა სალომე ზურაბიშვილმა განაცხადა, რომ პარლამენტის ყოფილ შენობაში სასურველია საერთაშორისო კონფერენციების ჩატარების ადგილი იყოს. შინაგან საქმეთა სამინისტროს განცხადებით კი, შენობაში საპოლიციო ჰაბი უნდა განთავსდეს.