„ნაციონალური მოძრაობა“ „ყაზტრანსგაზ-თბილისის“ მფლობელების გასაჯაროებას მოითხოვს.

 

„ყაზტრანსგაზ-თბილისის" გაყიდვის შემდეგ, კომპანიამ აბონენტებს, რომლებიც გაზს არასაყოფაცხოვრებო, კომერციული დანიშნულებით მოიხმარენ, ტარიფი 7%-ით(5,5 თეთრით) გაუზარდა, რაც მძიმედ აწვევება ყველა იურიდიულ პირს, – ამის შესახებ „ერთიანი ნაციონალური მოძრაობის" წევრმა პეტრე ცისკარიშვილმა დღეს გამართულ პრესკონფერენციაზე განაცხადა.

 

მისივე თქმით, სახელმწიფომ „ყაზტრანსგაზ-თბილისს" ჩამოაწერა 96 მილიონიანი დავალიანება და კომპანია გადაეცა ახალ მესაკუთრეს.

 

„2018 წლის ბოლოს ყაზტრანსგაზ-თბილისი" გაიყიდა და ქართული ბიზნეს ჯგუფის საკუთრება გახდა. „ყაზტრანსგაზ-თბილისის“ 100%-იანი წილის მფლობელი კომპანია „სი ბი ეს“ ჯგუფის მიერ ოფშორში დაფუძნებული Waltbay ltd გახდა. ამ კომპანიების ოფიციალური მესაკუთრე არის ხვიჩა მაქაცარია, რომელიც კახა კალაძის ბიზნესპარტნიორი და მასთან დაახლოებული პირია.

 

ვინ არიან ოფშორში დაფუძნებული ფირმის მეპატრონეები და მეწილეები ჩვენთვის ცნობილი არ არის", – განაცხადა ცისკარიშვილმა.

 

მან ასევე რამდენიმე მოთხოვნა წამოაყენა, კერძოდ, ოპოზიცია ითხოვს ოფშორში დაარსებული კომპანიის სხვა მფლობელებისა და მეწილეების ვინაობის გამხელას და ასევე დასახელდეს წყარო თუ როგორ გადაუხდის სახელმწიფო 40 მილიონ დოლარს ყაზახურ მხარეს.