„ჩვენ გვაქვს ზუსტი მოდელი იმისა, რა უნდა იყოს საქართველო" – ეს განცხადება მიხეილ სააკაშვილმა ლიეჟში, კონგრესის დარბაზში ემიგრანტებთან შეხვედრისას გააკეთა. მან მწვავედ გააკრიტიკა მოქმედი მთავრობა და დეტალურად ისაუბრა იამზე, თუ რა გეგმები აქვს მას საქართველოსთან მიმართებაში.
„ჩვენ გვაქვს ზუსტი მოდელი იმისა, რა უნდა იყოს საქართველო. წაგვართვეს სიტყვა იმედი და წაგვართვეს სიტყვა ოცნება. ყველაფერს გვართმევენ. ოცნება რომ გვესმის ცუდი ასოციაციაა უკვე. ეს არ შეიძლება იყოს ჩვენი ოცნების საქართველო. ივანიშვილმა გამოუცხადა ომი საქართველოს, როგორც ერს. საქართველოს, როგორც საზოგადობას. ივანიშვილის კონცეფცია არის ძალიან მარტივი. ყველა უნდა იყოს დაჩმორებული, ყველა უნდა იყოს ღარიბი და მთელი დოვლათი უნდა იყოს მარტო მის ხელში. ჩემი კონცეფცია არის სრულიად საწინააღმდეგო, საქართველოს უნდა იყოს მდიდარი, თითოეული ქართველი უნდა იყოს მდიდარი და ეს უნდა იყოს გადანაწილებული ყველაზე,“-განაცხადა მიხეილ სააკაშვილმა.
მისი თქმით, ყველა ის ემიგრანტი, რომელიც არის საქართველოდან გასული, ის არის საქართველოს მოქალაქე და მას უნდა ჰქონდეს საქართველოს პასპორტი. მიხეილ სააკაშვილის გეგმის მიხედვით, ემიგრანტებს უნდა შეეძლოთ ხმის მიცემა სახლიდან გაუსვლელად ელექტრონული ბარათით. საქართველოს მესამე პრეზიდენტი აცხადებს, რომ ქვეყანამ უნდა შემოიღოს ელექტორნული გადაწყვეტილების სისტემა. ანუ ნებისმიერი გადაწყვეტილება გამოვა ელექტრონულ კენჭისყრაზე, რომლის საშუალებითაც მოქალაქეები გააკეთებენ არჩევანს.
მიხეილ სააკაშვილის განცხადებით ეს ყველაფერი საქართველოში ოლიგარქიული მმართველობის დასრულებით მოხერხდება. მისივე თქმით, ჯერ საქართველოში არ არის ნიადაგი იმისთვის მზად, რომ ის დაბრუნდეს, თუმცა ეს მალე მოხდება.