ზუგდიდში მერიის მუნიციპალური სერვისების მართვის სამსახურის ყოფილი უფროსის თენგიზ ქობალიას ოჯახის წევრებისა და მხარდამჭერების საპროტესტო აქცია მიმდინარეობს.
აქციის მონაწილეები იუსტიციის სახლიდან მსვლელობით გაემართნენ სუსის სამეგრელო-ზემო სვანეთის რეგიონული წარმომადგენლობის შენობისკენ და რამდენიმე წუთით ცენტრალური გზა გადაკეტეს.
. ,,თავისუფლება თენგოს,, – სკანდირებდნენ აქციის მონაწილეები და მოუწოდებენ სუსის უფროსს, გამოვიდეს გარეთ და პასუხი გასცეს მათ მოთხოვნებს.
ამ წუთებში აქციის მონაწილეებმა სუსის შენობაში რეგიონული სამსახურის უფროსთან შეხვედრის მიზნით შესვლა სცადეს. მათ ამის საშუალება ადგილზე მობილიზებულმა პოლიციამ არ მისცა.
შეგახსენებთ , თენგიზ ქობალია გასული წლის . 24 დეკემბერს საკუთარ კაბინეტში დააკავეს. გამოძიება მას დანაშაულის შეუტყობინებლობას ედავება. სუს-ის განცხადებაში აღნიშნულია, რომ მან ზუგდიდის მუნიციპალიტეტის მერის ლაშა გოგიას და ვიცე-მერის გია გულორდავას მიერ განსაკუთრებით მძიმე დანაშაულის ჩადენის ფაქტი შეიტყო და აღნიშნულის შესახებ სამართალდამცავ ორგანოებს არ აცნობა. თენგიზ ქობალიას წინასწარი პატიმრობა 25 დეკემბერს შეეფარდა. იგი ბრალს არ აღიარებს
.