2018 წელს ქართველი ჯარისკაცების ნაწილი უნიფორმების გარეშე შეხვდა. სამხედრო ტანსაცმლის და აღჭურვის დეფიციტი ჯარში აუდიტის სამსახურმა გამოავლინა. სახელმწიფო მაკონტროლებელმა შემოწმების შედეგად დაასკვნა, რომ სამხედროებს არ აქვთ მაისურები, მაღალყელიანი, სპორტული ფეხსაცმელი და ქურთუკები.
მაკონტროლებელმა ორგანომ ძალოვანი უწყებების მიერ უნიფორმების შესყიდვები შეისწავლა და დაადგინა, რომ ამ მხრივ ყველაზე მძიმე ვითარება სწორედ თავდაცვის სამინისტროშია. უნიფორმების გარეშე დარჩენილი სამხედროების უზრუნველსაყოფად გამართული ტენდერები კი უწყების მთავარ სუსტ წერტილად რჩება, ჩაშლილი ტენდერების შედეგად კი ბოლოს ხელშეკრულება მარტივი წესით 1 პირთან ფორმდება, რაც მაკონტროლებელი ორგანოსთვის სერიოზულ კითხვებს აჩენს.
თავდაცვის სამინისტროში კი ხელს წინა ხელმძღვანელებისკენ იშვერენ.
სახელმწიფო აუდიტი ძალოვან უწყებებში შესყიდვების მიმართულებით სისტემურ პრობლემებზე საუბრობს. უნიფორმების შესყიდვის მიზნით გამოცხადებული ტენდერების 30% (შსს − 16%, თავდაცვის სამინისტრო − 9%, დაცვის პოლიცია − 2%, საპატრულო პოლიციის დეპარტამენტი − 2% და სასჯელაღსრულებისა და პრობაციის სამინისტრო − 1%) არაკონკურენტულ გარემოში მიმდინარეობდა. უშედეგოდ და კონკურენციის გარეშე დასრულებული ტენდერები უწყებებში კორუფციის რისკს ზრდის. 2017 წელს ჩატარებული ტენდერების 42 პროცენტი უშედეგოდ დასრულდა, საიდანაც საბოლოოდ 39 პროცენტი შეწყდა.
გაირკვა, რომ უნიფორმების და ეკიპირების პრობლემების წინაშე დგას თითქმის ყველა ძალოვანი უწყება. უნიფორმების დეფიციტი არ არის შინაგან საქმეთა სამინისტროში, თუმცა ირკვევა, რომ ის, რაც საპატრულო პოლიციას სრულყოფილი ფუნქციონირებისთვის აკლია, ფეხსაცმელებია.