დეპუტატი ეკა ბესელია დღეს შინაგან საქმეთა სამინისტროს მაღალი თანამდებობის პირებთან შეხვედრას გეგმავს. საქმე ეხება მისი პირადი ცხოვრების ამსახველი ვიდეომასალის, გავრცელებას. საპარლამენტო უმრავლესობის წევრი ამბობს, რომ ხმაურიანი საქმის მიუხედავად გამოძიების დეტალები მისთვის ამ დრომდე უცნობი რჩება. დეპუტატი სამართალდამცველებს გააქტიურებისკენ მოუწოდებს.
იურიდიული კომიტეტის ყოფილი თავმჯდომარე აცხადებს, რომ მის წინააღმდეგ დაწყებული მორიგი შეტევა საპარლამენტო უმრავლესობის სხდომაზე მსჯელობის ერთ-ერთი მთავარი საკითხი გახდება. ბესელია ამბობს, რომ ბრძოლის ბოლომდე მიიყვანს.
„მე მექნება ალბათ შეხვედრა შს სამინისტროს ხელმძღვანელობასთან, რომ ამ საკითხებზე ვისაუბროთ. გამოძიება რასაც აკეთებს მეტი ინფორმაცია უნდა მქონდეს. რამდენიმე გვარი მე თვითონ მივაწოდე, როგორც გითხარით და მითხრეს, რომ მათ იციან ეს და იციან სხვებიც. ამიტომ ველოდები ეს სხვები ვინ არიან. ამ ყველაფრის უკან ვიღაც დგას, ამიტომ ამაზე პასუხები მჭირდება. იმისთვის, რომ ამ ბრძოლას ვიღაცამ ჩამომაშოროს, ეს მეთოდები ამისთვის არის გამოყენებული ცხადია. გამორიცხულია, ვერავინ ამას ვერ ეღირსება,“-ამბობს ბესელია.