მშენებლობები მეწყერსაშიშ ტერიტორიაზე – გეოლოგები მოსალოდნელ კატასტროფაზე საუბრობენ. ჩამონგრევის საფრთხე, მათი გათვლებით, რამდენიმე მაღალსართულიან კორპუსს ემუქრება.
თემქა-გლდანის დამაკავშირებელ გზაზე ფერდობი დაიძრა, სადაც მეწყრული პროცესების გააქტიურება მცირე მშენებლობებმა განაპირობა.
აღნიშნული ტერიტორია 25 წლის განმავლობაში მშენებლობებისთვის დაკონსერვებული იყო, თუმცა, ერთი წლის წინ ახალი ნებართვები გაიცა, მშენებლებმა მეწყრულ ფერდობს ძირი გამოაცალეს, რასაც მძიმე შედეგი მოჰყვა.
საფრთხის შესახებ გეოლოგები მერიას დიდი ხანია, აფრთხილებენ, თუმცა, არანაირი ზომები მოსახლეობის უსაფრთხოების დასაცავად არ გატარებულა.
ოჯახები, რომლებიც პირდაპირ მეწყერსაშიში ტერიტორიის ქვეშ ცხოვრობენ, ყვებიან, რომ მშენებლობის დაწყებამდე ისინი არავის გაუფრთხილებია. ფერდობის ჩამოშლის ფაქტს თავად შეესწრნენ.
გეოლოგების თქმით, არასწორად დაგეგმილი მშენებლობების გამო, დედაქალაქი შენელებული მოქმედების ნაღმს დაემსგავსა, სადაც კატასტროფა ყოველ წუთს არის მოსალოდნელი. ის, რაზეც გეოლოგები განგაშის ზარს სცემენ, საერთოდ არ იცის თბილისის მერმა.
სახიფათო მშენებლობებსა და მოსალოდნელ კატასტროფაზე დაკავშირებით "კურიერის" კითხვაზე პასუხად თბილისის მერმა თქვა, რომ საკითხში ვერ ერკვევა.
ილიას სახელმწიფო უნივერსიტეტის დედამიწის შემსწავლელ მეცნიერებათა ინსტიტუტის და ეროვნული სეისმოლოგიური ცენტრის დირექტორი, თეა გოდოლაძე, ამბობს, რომ სწორედ 300 ლარი და ერთი ბოთლი კონიაკია საჭირო იმისათვის, რომ მერიაში გეოლოგიური სამსახურისგან ნებართვა მიიღო.
შეშელიძის ქუჩა, მთაწმინდის ქედი, ჟვანიას ქუჩა, წყნეთის ქუჩა – ეს იმ ადგილების მხოლოდ მცირე ჩამონათვალია, სადაც სპეციალისტები უახლოეს მომავლში კატასტროფას ელოდებიან.