“როდესაც მე გავხდი იუსტიციის საბჭოს მდივანი, ზოგადად, ძალიან დიდი ძალისხმევა განვახორციელე, რომ "ნაციონალური მოძრაობიდან" მართლმსაჯულების სათავეები გამომეტანა და სასამართლო დამდგარიყო რეალურად დამოუკიდებლობის გზაზე. – განაცხადა სააპელაციო სასამართლოს უვადო მოსამართლემ ლევან მურუსიძემ ტელეკომპანია იმედის გადაცემაში "პირისპირ''
თუმცა, მთელი პასუხისმგებლობით იმასაც ვაცხადებ, რომ ეს სადავეები "ქართული ოცნებისთვის" ნამდვილად არ ჩამიბარებია და თუ გადახედავთ ამ სტატისტიკასაც და განსაკუთრებით იმ საერთაშორისო ორგანიზაციების დასკვნებს, საქართველოს სასამართლო ევროკავშირში არის მე-18 ადგილზე.
ეს წარმატება, რომელსაც ჩვენ მივაღწიეთ, მივაღწიეთ ძალიან დიდი შრომის შედეგად. ამაში ჩადებულია ძალიან ბევრი მოსამართლის შრომა, ჩვენი ნერვები, გათენებული ღამეები. ვერ წარმოიდგენთ რამხელა წნეხს განვიცდი პირადად მე და ჩემი ოჯახის წევრები, მოხუცი მშობლები, სახლში რომ მივიდოდი, რეალურად კითხვის დასმასაც ვერ ბედავდნენ, რომ ვთქვათ, როგორ იყო საქმე და რა პრობლემები შეიძლება შემქმნოდა.
ამ ყველაფრის გამო მე ვერ გავაკეთებ იმას, რომ ყველაფერს ხაზი გადავუსვა და ვერ მივცემ კომფორტს ვერც პოლიტიკურ პარტიებს და ვერც არასამთავრობო ორგანიზაციებს, როდესაც სასამართლომ ამხელა წარმატებას მიაღწია, რომ მე ავდგე და გადავდგე
“ერთადერთი საშუალება არის ის, რომ თუ "ქართული ოცნება" აყვება იმ პიარს, რომელიც წამოსულია "ნაციონალური მოძრაობიდან", არასამთავრობო ორგანიზაციებიდან და ზოგადად ეს არაჯანსაღი შეტევა, რომელიც ხორციელდება სასამართლოზე,და გადაწყვეტს, რომ დასაჯოს ეს სასამართლო სისტემა, ამისთვის მე მზად ვარ, მაგრამ ის, რომ მე ყველაფერს ხაზი გადავუსვა, ეს იქნება ღალატი ყველა იმ ადამიანის, ვინც მუხლჩაუხრელად იბრძოდა ამ შედეგებისთვის და მე პირადად არ ვაპირებ ეს კომფორტი ამ პოლიტიკურ პარტიებს მივცე ”- განაცხადა ლევან მურუსიძემ.