ია კერზაიას საქმე – განათლების სამინისტროს წინააღმდეგ "სარჩელი ახალგაზრდა იურისტთა ასოციაციამ" შეიტანა. არასამთავრობო ორგანიზაციას აინტერესებს რა საფუძველი არსებობდა ზუგდიდის მე-6 საჯარო სკოლაში ინსპექტირების ჩატარების, რომლის შემდეგაც სკოლის დირექტორი ია კერზაია გარდაიცვალა.
"ახალგაზრდა იურისტთა ასოციაციის" იურისტი, მიხეილ ჯახუა განმარტავს, რომ საჯარო ინფორმაციას განათლების უწყება არასამთავრობო ორგანიზაციას არ უგზავნის. ჯახუას თქმით, ჩნდება კითხვა – იყო თუ არა გამონაკლისი ზუგდიდის სკოლა, სადაც ანონიმური წერილის შესვლისთანავე გააგზავნეს ინსპექცია.
საია-ს აინტერესებს რამდენი საჩივარია შესული განათლების სამინისტროში და რამდენზე მოახდინა უწყებამ რეაგირება.
„იყო თუ არა ზუგდიდის მეექვსე სკოლა გამონაკლისი და განსხვავებული მიდგომა გამოავლინა თუ არა სამინისტრომ ამ შემთხვევაში. ამ დასკვნის გასაკეთებლად მნიშვნელოვანია შევისწავლოთ, შევიდა თუ არა სხვა განცხადებები, იმ განცხადებებზე რამდენ ხანში მოახდინა რეაგირება სამინისტრომ და რამდენ ხანში დაწერა შესაბამისი დასკვნა. სამინისტრომ არასრულად მოგვაწოდა ინფორმაცია, ჩვენ გავაგრძელებთ დავას სასამართლოში და ვეცდებით, სასამართლოს გზით მივაღწიოთ იმ შედეგს, რომ მივიღოთ ის ინფორმაცია, რომელიც განეკუთვნება საჯარო ინფორმაციის კატეგორიას და რომელიც მნიშვნელოვანია მეექვსე სკოლის ინსპექტირების ფაქტის შესაფასებლად,“ – განაცხადა მიხეილ ჯახუამ.
საიას გარდა პროკურატურას საქმის დამატებითი დეტალები მიაწოდა ია კერზაიას შვილმა, ბაჩანა შენგელიამ. მისი თქმით, ზუგდიდის მე-6 საჯარო სკოლის დირექტორს მმართველი პარტიის სასარგებლოდ აგიტაციას აიძულებდნენ, რაზეც ია კერზაიამ უარი განაცხადა. კერზაიას შვილი ამტკიცებს რომ ინსულტი განხორციელებულმა პოლიტიკურმა ზეწოლამ გამოიწვია.