ქართველ მუსლიმთა კავშირი უკრაინის ეკლესიას დამოუკიდებლობის მოპოვებას ულოცავს.
ქართველ მუსლიმთა კავშირის თავმჯდომარე ტარიელ ნაკაიძე სოციალურ ქსელში "სრულიად უკრაინელ ხალხს მიმართავს:
,,საქართველოს მუსლიმების სახელით სულითა და გულით გილოცავთ უკრაინის მართლმადიდებლური ეკლესიის დამოუკიდებლობის აღიარებას, რომელიც 7 იანვარს ტომოსის მიღებით განმტკიცდა სტამბულში. ამ მნიშვნელოვან გამარჯვებას ვულოცავ სრულიად უკრაინელ ხალხს, უკრაინელ მართლმადიდებელ მრევლს. გამარჯვებისთვის განვლილი ეს დიდი ბრძოლის გზა იყო თავისუფალი და ღირსეული ერის სრული გამოვლინება. ამავე დროს უკრაინის მართლმადიდებელი ეკლესიის ავტოკეფალია მსოფლიო ქრისტიანული სამყაროსთვის წარმატებული, ახალი და მნიშვნელოვანი რეალობაა.გულწრფელად ვუერთდებით უკრაინელი ხალხის სიხარულს და ოცნების ახდენას.'' – წერს იგი.
საქართველოს მართლმადიდებელი ეკლესია კი დუმს.
თეოლოგების ერთი ნაწილის მოსაზრებით, დაყოვნებას აზრი არა აქვს და ტომუსის ტექსტის გაცნობის მომიზეზება ვერ გადაფარავს ყოყმანის ნამდვილ მიზეზს: ,, გარდაუვალი პროცესია, ადრე თუ გვიან საქართველოს მაინც მოუწევს აღიაროს უკრაინის ეკლესიის ავტოკეფალია და ჯობია ახლა აღიარონ. რაც შეეხება რუსეთის ფაქტორს, რუსეთი ისედაც ყოველთვის გაღიზიანებულია და ამ მიზეზით უკრაინის ეკლესიის ავტოკეფალიის აღიარებისგან თავშეკავება თავის მოტყუება იქნება.'' – განაცხადა თეოლოგმა ვაჟა ვარდიძემ