პატრიარქის ეპისტოლეს გამოქვეყნების შემდეგ მმართველი გუნდი საკანონმდებლო ცვლილებებზე ალაპარაკდა
დღეს პარლამენტის თავმჯდომარე პატრიარქს დაეთანხმა და განაცხადა, რომ ცილისწამება პრობლემაა და დაადასტურა, რომ საკანონმდებლო ცვლილებები საჭიროა და დიდი ალბათობით, მმართველი გუნდი ამ ინიციატივაზე საგაზაფხულო სესიაზე იმსჯელებს.
ეჭვი, რომ ხელისუფლება სიტყვის თავისუფლების შესახებ კანონში გამკაცრებას და დამატებით რეგულაციებს აპირებდა, ოპოზიციას სალომე ზურაბიშვილის პირველი საახალწლო მიმართვის მოსმენისთანავე გაუჩნდა. ახალი წლის ღამეს პრეზიდენტმა თქვა, რომ საჭიროა ფიქრი, რომ კანონით, ერთდროულად, სიტყვის თავისუფლებაც და ადამიანის ღირსება იყოს დაცული. კობახიძის დღევანდელმა განცხადებამ კი ოპოზიცია საბოლოოდ დაარწმუნა, რომ ხელისუფლებას სიტყვის თავისუფლების შეზღუდვას კანონში ცვლილებებით შეეცდება.
სამოქალაქო სექტორი მიიჩნევს, რომ ხელისუფლებას კანონის გამკაცრება პოლიტიკური მიზნებისას და კრიტიკული აზრის ჩასახშობად სჭირდება და ამზადებს ნიადაგს, რომ ცვლილებები კრიტიკული მედიის წინააღმდეგ გამოიყენოს.
„საუბარი იმაზე, რომ ცილისწამებამ მოიმატა, არ არსებობს სათანადო მექანიზმები, არის მცდარი და საზოგადოების შეცდომაში შეყვანა. ჩვენი კანონმდებლობა აბსოლუტურად გამართულია ამ კუთხით და აქვს სწორი ბალანსი ნაპოვნი, სიტყვის თავისუფლებასა და ადამიანის პატივსა და ღირსებას შორის. თუკი ასეთ ცვლილებების ინიცირებაზე იქნება საუბარი, ყველას კარგად უნდა გვესმოდეს, რომ ეს არის საშიში სიგნალი, რომ ხელისუფლება და სხვადასხვა ავტორიტეტები, რომლებსაც არ სიამოვნებთ კრიტიკა, აპირებენ ადამიანებს, მედიას, არასამთავრობო ორგანიზაციებს შეუზღუდონ თავისუფალი სიტყვა,“-განაცხადა არასამთავრობო ორგანიზაცია ”საქართველოს დემოკრატიული ინიციატივას” თავმჯდომარე გიორგი მშვენიერაძემ.
შეგახსენებთ კათოლიკოს პატრიარქმა ილია მეორემ საშობაოეპისტოლეში ხაზგასმით აღნიშნა, რომ ხშირად ადგილი აქვს სიტყვის თავისუფლებით ბოროტად სარგებლობას და "სიტყვის თავისუფლების დამახინჯებული აღქმას''.