საქართველოს პრეზიდენტმა სალომე ზურაბიშვილმა ზუგდიდში „პრეზიდენტის ნაძვის ხეზე“ მოსახლეობას უმასპინძლა. „ზუგდიდში, როცა ვართ არ შეიძლება დავივიწყოთ ხიდს იქით ჩვენი თანამემამულეები – ჩვენი ქვეყნის მოქალაქეები. დღეს ვართ გაყოფილი, მაგრამ ვართ ერთად. ამ დღესასწაულებზე ერთად ვართ. უნდა ვიფიქროთ იმაზე, როგორ გავერთიანდეთ, შევრიგდეთ, ეს არის ჩვენი ერთიანი მომავალი და საიდან თუ არა ზუგდიდიდან უნდა მივულოცოთ ჩვენს აფხაზ ძმებს და დებს დღევანდელი და ხვალინდელი დღესასწაული. ჩემთვის ასევე ძალიან მნიშვნელოვანია, რომ „პრეზიდენტის ნაძვის ხე“ ტარდება აქ, ზუგდიდში და არა თბილისში, რადგან ჩვენთვის, (ამას ვიმეორებდი წინასაარჩევნო პერიოდში) რეგიონები არის ძალიან მნიშვნელოვანი. საქართველო ძლიერი იყო, როცა რეგიონები იყო ძლიერი. ამ რეგიონების სიძლიერეზე იდგა საქართველო და დღესაც ასე არის და ასე უნდა იყოს. ამიტომ გადავწყვიტე ზუგდიდიდან დამეწყო ჩემი გასვლა რეგიონებში. ძალიან ბედნიერი ვარ, რომ ეს იწყება ზუგდიდიდან. ეს არის კარგი საწინდარი ჩვენი ბედნიერი მომავლისთვის“, – განაცხადა ზურაბიშვილმა.
მისივე თქმით, ყველამ ერთად უნდა ილოცოს, რომ ეს ქვეყანა გამთლიანდეს და იყოს ძლიერი და გაბრწყინებული.