ზუგდიდის მერიის ააიპ-ის სპორტულ დაწესებულებათა ცენტრში საკადრო ცვლილებების შესახებ ინფორმაციას ყოფილი დირექტორი ადასტურებს. „მე ფაქტიურად უამრავი გეგმა მაქვს ისევ ჩემს სამსახურში, უფრო მეტი დრო მჭირდება პრაქტიკულად, რომ განვახორციელო ის საქმე, რასაც მოსწავლე-ახალგაზრდობის ხელშეწყობა ქვია, დავგეგმო და განვავითარო ის იდეები, რაც ამ მიმართულებით მინდა გავაკეთო და როცა დირექტორი ვიყავი, ამისთვის ფაქტიურად არ მრჩებოდა იმდენი დრო. ჩვენ წლებია ერთად ვმუშაობთ, მე და გოჩა, შევთანხმდით და შეხმატკბილებულად მოვრიგდით. 31-ში მივმართე განცხადებით მერიას, გაუკვირდათ ჩემი ეს გადაწყვეტილება, მაგრამ დამთანხმდნენ, რადგან მე ისევ სამსახურის საკეთილდღეოდ გავაკეთე ეს“- განუცხადა „ოდიშინიუსს“ დავით კვაშილავამ. ზუგდიდის მუნიციპალიტეტის ააიპ-ის სპორტის სამსახურის დირექტორის პოსტზე მისი მოადგილე გოჩა ჩიქოვანი დაინიშნა, ხოლო დავით კვაშილავამ მოადგილის პოსტი დაიკავა. რაც შეეხება კითხვას, სხვა საკადრო ცვლილებები ხომ არ განხორციელებულა მათ სამსახურში, ან ხომ არ იგეგმება მომავალში, კვაშილავა ამბობს, რომ ამაზე საუბარი არ ყოფილა.