ზუგდიდის მერიის ეკონომიკური მართვისა და მუნიციპალური სერვისების სამსახურის უფროსი თენგო ქობალია საკუთარ სამუშაო ოთახში დააკავეს.
მერიაში დაკავების ფაქტს ადასტურებენ, თუმცა უწყებაში ამბობენ, რომ დაკავების მიზეზი მათთვის უცნობია
.საკრებულოს თავმჯდომარის მამუკა წოწერიას ინფორმაციით, მიმდინარეობს საგამოძიებო მოქმედებები და სხვა დეტალები მათთვის უცნობია.
არაოფიციალური ინფორმაციით, თენგიზ ქობალიას დაკავება უკავშირდება სკანდალურ აუდიოჩანაწერს, რომელშიც ბიზნემენი ზურაბ კვირკვია ზუგდიდის უკვე ყოფილ მერს, ლაშა გოგიას ესაუბრება, ჩანაწერში, ბიზნესმენი გოგიას ახსენებს, როგორ გადასცა გარიგების სანაცვლოდ მის მოადგილეს, გია გულორდავას 10 ათასი დოლარი კონვერტით. ასევე დამატებით როგორ ჩარიცხა კონკრეტულ საბანკო ანგარიშზე 30 ათასი ლარი.
ჩანაწერში იხსენიება თენგიზ ქობალიაც , რომელმაც ლაშა გოგიას გადადგომისთანავე დაადასტურა თავისი მონაწილეობა ფარულ ჩანაწერებში, თუმცა წილებზე და კორუფციულ გარიგებებზე საუბარი უარყო. მისი თქმით, დაპირისპირებას შეხვედრის დროს ადგილი არ ჰქონია და სხვა დამატებით დეტალებზე სამართალდამცველებთან აპირებს საუბარს.