„ევროპული საქართველოს“ წევრმა სერგო რატიანმა შს მინისტრ გიორგი გახარიას მიმართა, გრძნობს თუ არა პასუხისმგებლობას ზუგდიდის მე-6 საჯარო სკოლის დირექტორის, ია კერზაიას გარდაცვალებასთან დაკავშირებით.
როგორც რატიანმა პარლამენტის სხდომაზე განაცხადა, სადაც შს მინისტრს უსმენენ, სწორედ გახარია იყო პასუხისმგებელი სამეგრელოში საარჩევნო კამპანიის დროს.
„ზუგდიდის მე-6 სკოლასთან მიმართებაში, 8 ნოემბერს შედის საჩივარი და იმ დღესვე წერს ბრძანებას მინისტრი და მეორე დღეს შედიან ინსპექციაზე. ეს ხდება იმ დროს, როდესაც თქვენ იყავით პასუხისმგებელი სამეგრელოში საარჩევნო კამპანიის დროს. ეს ხდება იმ დროს, როდესაც თავად ქალბატონმა ია კერზაიამ თავის დროზე თქვა, რომ მასზე ხდებოდა ზეწოლა. რატომ არ არის დღემდე გათავისუფლებული განათლების სამინისტროს აუდიტის სამსახური და როგორ უყურებთ ამ საკითხს? ასევე, გრძნობთ თუ არა პასუხისმგებლობას იმასთან დაკავშირებით, რაც მოხდა ზუგდიდში“, – განაცხადა რატიანმა.
გიორგი გახარიამ ამ თემაზე საუბრისას ოპონენტები გააკრიტიკა და ადამიანური ტრაგედიების პოლიტიზირებისგან თავის შეკავებისკენ მოუწოდა .
„როგორც ვიცი დღეს, ბატონი შენგელია, თუ არ ვცდები იქნა ან უკვე იყო დაბარებული პროკურატურაში, მას გამოკითხავენ და იქ შემადგენლობა თუ იქნა, რა თქმა უნდა, საქმე უნდა აღიძრას,- ადამიანური ტრაგედიის, გარდაცვალების და სიკვდილის პოლიტიკური მიზნებისთვის გამოყენება, რასაც ამ ბოლო პერიოდში, ვხედავთ, უბრალოდ ამორალურია,“ – განაცხადა გახარიამ