პოლიტიკური ბრძოლა ნინო ანანიაშვილის წინააღმდეგ ოქიტაშვილის დროშის ქვეშ

0
425
საქართველოს კულტურის პალატის პრეზიდენტი ოპერის საბალეტო დასის ხელმძღვანელის თანამდებობიდან ნინო ანანიაშვილის გადადგომას ითხოვს.
 
"ოპერა ხელში აქვთ ჩაგდებული ვაშაძეებს და ანანიაშვილებს", –  აცხადებს  ოქიტაშვილი
 
იგი ამბობს, რომ არ შეიძლება საბალეტო დასს ხელმძღვანელობდეს ადამიანი, რომლის ქმარიც ხალხს ხელისუფლების დამხობისკენ მოუწოდებს. ოქიტაშვილი მოითხოვს, რომ ანანიაშვილი საკუთარი ქმრის, გრიგოლ ვაშაძის, განცხადებებს გაემიჯნოს, ან გადადგეს ოპერისა და ბალეტის თეატრის ხელმძღვანელის პოსტიდან.
 
"როდესაც საბალეტო დასს ხელმძღვანელობს ადამიანის მეუღლე, რომელიც საქართველოს ემუქრება და მოსახლეობას მოუწოდებს, დაამხოს ეს ხელისუფლება, საქართველოს მთავრობას ეძახის კრიმინალებს, ბიძინა ივანიშვილს ეძახის ნარკო-ბარიგას, მე მივმართავ კითხვით ქალბატონ ნინო ანანიაშვილს – ან გამოვიდეს და გემიჯნოს თავის მეუღლეს და თქვას, რომ არ ეთანხმება, ან გადადგეს. არ შეიძლება. ყველა სახელმწიფოში, ყველა ქვეყანაში ოპერა არის ქვეყნის სავიზიტო ბარათი. ოპერა ხელში აქვთ ჩაგდებული ვაშაძეებს და ანანიაშვილებს, იქ შესვლის უფლება არ აქვს ოპერაში მოღვაწე ისეთ ცნობილ ადამიანს, როგორიც არის ირმა ნიორაძე, ცისკარიძე და ა.შ." – ამბობს ოქიტაშვილი და ამ მოთხოვნით ხელოვნების, მასმედიისა და სპორტის პროფკავშირთან ერთად, ორშაბათიდან პერმანენტულ აქციებს აანონსებს. დავით ოქიტაშვილის თქმით, ოპერისა და ბალეტის თეატრში ნეპოტიზმია და ბევრ ცნობილ და ნიჭიერ ხელოვანს თეატრს არც კი აკარებენ:

 
„ნინო ანანიაშვილს, როგორც ბალერინას ძალიან დიდ პატივს ვცემ, მაგრამ როგორც ხელმძღვანელი არ ვარგა. ისეთ ცნობილ ხელოვანებს, როგორიცაა ირმა ნიორაძე, ნიკოლოზ ცისკარიძე და ბალეტის კიდევ ბევრი ნიჭიერი მსახიობი, არ აკარებენ ოპერას. ასევე შეუძლებელია, შენი ოჯახის წევრი გამოდიოდეს ქვეყნის დამხობის მოთხოვნით და შენ ამ ქვეყნის ოპერას ხელმძღვანელობდე. იქ მომუშავე ადამიანები ძალიან უკმაყოფილოები არიან, მაგრამ ეშინიათ ხმამაღლა თქმა, რომ არ დაკარგონ ადგილები. ოპერის მომღერლებს ერთი დარბაზი დაუტოვეს მაშინ, როცა ბალეტს ხუთი დარბაზი აქვს.“- განაცხადა დავით ოქიტაშვილმა
წინა სტატიააშშ-ის წარმომადგენელთა პალატამ ერთსულოვნად დაამტკიცა საქართველოს მხარდამჭერი ორპარტიული კანონპროექტი -„საქართველოს მხარდამჭერი აქტი.“
შემდეგი სტატიაზუგდიდში თხილის ქარხანა დააყაჩაღეს – წაღებულია სოლიდური თანხა[Video]
ტელეკომპანია ოდიშის საინფორმაციო სამსახური