მე-6 საჯარო სკოლის დირექტორის საქმის გამოძიების მოთხოვნით ზუგდიდში აქცია გაიმართება. ამის შესახებ სოციალურ ქსელში ია კერზაიას შვილმა დაწერა. "მიუხედავად არაერთი საჯარო განცხადებისა ია კერზიას საქმეზე გამოძიება დაწყებული არ არის. გუშინ უკვე წერილობითაც მივმართეთ საქართველოს მთავარ პროკურატურას და შინაგან საქმეთა სამინისტროს გამოძიების დაწყების მოთხოვნით.

ზეგ, 22 დეკემბერს, 14:00 საათზე, ქ. ზუგდიდში, გუბერნიის შენობის წინ გავმართავთ მშვიდობიან აქციას გამოძიების დაწყებით მოთხოვნით. ყველა ადამიანს, ვისთვისაც მნიშვნელოვანია ამ საქმის სრული და ობიექტური გამოძიება, გთხოვთ, შემოგვიერთდეთ.

გამოიძიე ღირსების საქმე!"- წერს ბაჩანა შენგელია. 

ია კერზაია, რომლის ოჯახიც ხელისუფლებას საპრეზიდენტო არჩევნების პერიოდში მასზე ზეწოლაში ადანაშაულებდა, 9 დეკემბერს გარდაიცვალა. ინსულტის მძიმე დიაგნოზით  ის ქუთაისის ინტერვენციული მედიცინის ცენტრის რეანიმაციაში იყო მოთავსებული.