ფრაქცია  „ერთიანი ნაციონალური მოძრაობა“  ზუგდიდის 2019 წლის ბიუჯეტს მხარს არ დაუჭერს. ამის შესახებ ფრაქციის თავმჯდომარე ანა წითლიძემ დღეს გამართულ ბრიფინგზე განაცხადა. წითლიძის თქმით, ზუგდიდის 2019 წლის ბიუჯეტი  34 მილიონს შეადგენს, აქედან 22 მილიონი ლარი სახელფასო ფონდია. ასევე შემცირებულია სოციალური სფეროს ბიუჯეტი.  „მაშინ, როდესაც ზუგდიდს ქალაქის სტატუსი ჩამოერთვა, „ქართული ოცნების“  დაპირება იყო ის, რომ შემცირდებოდა ადმინისტრაციული და ბიუროკრატიული ხარჯები, რაც აღმოჩნდა მორიგი მტკნარი სიცრუე, ისევე როგორც ყველა სხვა დაპირება ხელისუფლების მხრიდან და ჩვენ ვხედავთ, რომ არათუ შემცირდა ბიუროკრატიული ხარჯები, არამედ გაზრდილია დაეს იმ ფონზე, როცა ერთი წლის განმავლობაში არც ერთი ინფრასტრუქტურული პროექტი არ განხორციელებულა. ეს არის არა მხოლოდ მავნებლური, არამედ დანაშაულებრივი დოკუმენტი და მოვუწოდებთ საკრებულოს უმრავლესობის წევრებს, ხმა არ მისცენ ამ დოკუმენტს,დააბრუნონ ის ზუგდიდის მერიაში და მოითხოვონ მისი ხელახლა რეორგანიზაცია. ასევე მოვუწოდებთ მერიას გაასაჯაროვოს ის 2300 ადამიანი, ვისზეც დაიხარება 22 მილიონი ლარი, რა დავალებას ასრულებენ ისინი, ჩვენი ინფორმაციით, ეს ადამიანები არიან ქართული ოცნების აქტივისტები და სწორედ ამიტომ არ ასაჯაროვებენ მათ სახელებს. მათ აქვთ ერთადერთი ამოცანა, საარჩევნო პროცესებში ჩაერთონ, სხვა ფუნქცია ამ ადამიანებს არ გააჩნიათ.“- განაცხადა ანა წითლიძემ.