დავით კირკიტაძემ წინასწარი დაკავების იზოლატორში შიმშილობა დაიწყო. გაერთიანებული ოპოზციის ერთ ერთი ლიდერი აცხადებს, რომ ის პოლიტიკური პატიმარია და ციხეში ივანიშვილის პოლიტიკური დაკვეთით ჩასვეს. გვიან ღამით კირკიტაძე იზოლატორში ადვოკატმა მოინახულა. მას ბრალს დღეს ოფიციალურად წაუყენებენ. შს სამინისტრო ოპოზიციის ქვემო ქართლის ორგანიზაციის ხელმძღვანელს, სისხლის სამართლის კოდექსის 353-ე მუხლის პირველი ნაწილის დარღვევაში ადანაშაულებს, რაც ექვსი თვიდან ორ წლამდე პატიმრობას ითვალისწინებს. „მიგვაჩნია, რომ ადამიანი, როდესაც ახორციელებს მის კონსტიტუციით გარანტირებულ უფლებას, ეს არის გამოხატვის, გადაადგილების უფლება, ამ დროს საუბარი პოლიციის მუშაკებზე თავდასხმაზე, მის სამსახურეობრივ საქმიანობასთან დაკავშირებით საუბარი არის რბილად რომ ვთქვათ შეუთავსებელი კანონის მოთხოვნასთან,“-განაცხადა დავით კირკიტაძის ადვოკატმა გიორგი კონდახაშვილმა. გაერთიანებული ოპოზიციის ერთ-ერთ ლიდერი და ენმ-ს წევრი დავით კირკიტაძე სამართალდამცველებმა გუშინ საგარეჯოში დააკავეს. მას ბრალი დაკავებისას ადგილზევე გააცნეს. ოპოზიციის ერთ-ერთ ლიდერს ბრალად სსკ-ს 353-ე მუხლის პირველი ნაწილი ედება, რაც პოლიციელზე თავდასხმას, ფიზიკური შეურაცხყოფას და ქონების დაზიანებას გულისხმობს. შინაგან საქმეთა სამინისტროს ინფორმაციით, კირკიტაძის დაკავება, მოსამართლის განჩინების საფუძველზე მოხდა.