სალომე ზურაბიშვილი ავლაბრის საპრეზიდენტო რეზიდენციაში გადასვლას არ აპირებს და ათონელის რეზიდენციაში მიმდინარე რემონტის გამო პრეზიდენტის რანგში პირველ სტუმრებს ერთ-ერთ სასტუმროში მიიღებს.
პრეზიდენტის ადმინისტრაციის მომავალი ხელმძღვანელის ინფორმაციით, ათონელის რეზიდენცია ბოლომდე დასრულებული არ არის და საპრეზიდენტო ფლიგელის გამართვას კიდევ რამდენიმე თვე დასჭირდება, თუმცა მზად არის ადმინისტრაციული მხარე, სადაც სალომე ზურაბიშვილი მუშაობას რამდენიმე დღეში შეუდგება. მიუხედავად იმისა, რომ ავლაბრის რეზიდენცია პრეზიდენტის ადგილსამყოფელად აღარ ითვლება, მმართველი გუნდი მას სამომავლოდ უმაღლესი დონის დელეგაციების მისაღებ ადგილად განიხილავს.
„საპრეზიდენტო ფლიგელი ათონელზე, საჭიროებს ორ-ორ თვე ნახევარს, მაგრამ ადმინისტრაციული ნაწილი არის მზად. ჯერ ადმინისტრაციულ ნაწილში იქნება და შემდგომში საპრეზიდენტო ფლიგელში გადმოვა.
პარლამენტის თავმჯდომარე, პრემიერ-მინისტრი, საგარეო საქმეთა სამინისტრო და ასევე პრეზიდენტი, ისარგებლებენ მაღალი დონის ვიზიტების დროს ავლაბრის რეზიდენციის იმ ნაწილით, რომელსაც ჰქვია საპრეზიდენტო ფლიგელი,“-განაცხადა ლაშა ჟვანიამ.