„ჯერ სახელმწიფო წაგვართვეს, არჩევნები წაგვართვეს, ახლა გვართმევენ გადაადგილების თავისუფლებას,“ – ასე აფასებს გაერთიანებული ოპოზიციის ყოფილი საპრეზიდენტო კანდიდატი, გრიგოლ ვაშაძე გურჯაანში შექმნილ სიტუაციას.
სამართალდამცავებმა გურჯაანში რამდენიმე ლოკაციაზე გზა გადაკეტეს და აქციის მონაწილეებს არ აძლევდნენ გადაადგილების შესაძლებლობას, თუმცა ოპოზიციის მხარდამჭერებმა გზის სავალი ნაწილი საკუთარი ძალებით გაათავისუფლეს და თელავის მიმართულებით მიემგზავრებიან.
„ეს არის შევარდნაძის პოლიცია, შესაბამისი სიფათები აქვთ და შესაბამისი უფროსები ჰყავთ. რომ ჰკითხო, რატომ არ გვიშვებენ თელავში, უსაფრთხოებაო, ვისი უსაფრთხოება? სალომე ზურაბიშვილის? ვის რათ უნდა სალომე ზურაბიშვილი, ან დაცვა რათ უნდა, გამოვიდეს ქუჩაში წყნარად ივლის,“ – განაცხადა გრიგოლ ვაშაძემ.
ვაშაძე აკრიტიკებს სამართალდამცავებს, რომლებიც ოპოზიციას მხარდამჭერებთან ერთად გადაადგილების შესაძლებლობას არ აძლევს.
გურჯაანში სამართალდამცავებმა რამდენიმე ადგილას გადაკეტეს გზა ავტობუსებით და საპატრულო პოლიციის მანქანებით. ისინი აქციის მონაწილეებს თელავისკენ გზის გაგრძელების საშუალება არ აძლევდნენ და სხვა მიმართულებით გადაადგილებისკენ მოუწოდებდნენ.
თელავის ცენტრში ინაუგურაციის პარალელურად მასშტაბური აქცია გაიმართება, სადაც არჩევნების გაყალბებას გააპროტესტებენ.