ახალი წლის მოახლოებასთან და შესაძლო რისკების თავიდან ასაცილებლად პარლამენტში დღეს ახალი კანონპროექტი დარეგისტრირდება – საუბარია პიროტექნიკის არასრულწლოვნებისთვის მიყიდვის აკრძალვაზე.
დოკუმენტის თანახმად, ადმინისტრაციულ სამართალდარღვევათა კოდექსში ახალი მუხლი გაჩნდება, რომელიც არასრულწლოვანთათვის პიროტექნიკური ნაკეთობების მიყიდვის შემთხვევაში ჯარიმას ითვალისწინებს.
ფიზიკური პირი 100 ლარით, იურიდიული კი – 200 ლარით დაჯარიმდება. განმეორების შემთხვევაში ჯარიმა ორმაგდება. კანონპროექტის ავტორები მისი მიღების საჭიროებას გასული წლების გამოცდილებით ხსნიან.
„რეგულაციის მთავარი მიზანი არის, 18 წლამდე ასაკის ბავშვებისთვის პიროტექნიკაზე წვდომის შეზღუდვა , რადგან თავიდან ავიცილოთ ტრავმატიზმი, რომელიც უკავშირდება პიროტექნიკის გამოყენებას.
ეს იქნება მნიშვნელოვანი გზავნილი მშობლებისთვის,რომ ბავშვებისთვის არ შეიძლება პიროტექნიკაზე წვდომა“-ამბობს მარიამ ჯაში.