ზუგდიდის მუზეუმის გათავისუფლებულმა გიდმა აღდგენის შესახებ გადაწყვეტილება კანცელარიას გადასცა. უზენაესმა სასამართლომ 2017 წლის 1 თებერვალს სამსახურიდან გათავისუფლებული გიდი სამსახურში აღადგინა და ელზა ზოდელავამ დღეს ქუთაისის სააპელაციო სასამართლოს გადაწყვეტილება მუზეუმის კანცელარიაში მიიტანა.გიდის უფლებებს „საერთაშორისო გამჭვირვალობა – საქართველოს“ იურისტი ლელა მოწონელიძე იცავდა.
ჯერ კიდევ მიმდინარე წლის ივნისის თვეში უზენაესმა სასამართლომ დადიანების ისტორიულ–არქიტექტურული მუზეუმის ყოფილი თანამშრომლის ელზა ზოდელავას სამსახურიდან გათავისუფლების ბრძანება უკანონოდ ცნო და ქუთაისის სააპელაციო სასამართლოს გადაწყვეტილება ძალაში დატოვა.აღნიშნული გადაწყვეტილების თანახმად, მუზეუმს ელზა ზოდელავას სამსახურში აღდგენა და განაცდურის ანაზღაურება დაავალა, რაც, დღეის მდგომარეობით, 6000 ლარს შეადგენს.მუზეუმის გათავისუფლებულ გიდს არ დახვდა ზუგდიდის ისტორიულ-ეთნოგრაფიული მუზეუმის დირექტორი ლილი ბერაია. ბერაიამ არც ჟურნალისტების ზარებს უპასუხა. მანამდე,კი ამ ფაქტთან დაკავშირებით ლილი ბერაია აცხადებდა,რომ სააპელაციო სასამართლოს გადაწყვეტილებას გაასაჩივრებდა.
ელზა ზოდელავა მუზეუმის რუსულ, პოლონურ და ქართულენოვან გიდად 6 წელი მუშაობდა. ის სამსახურიდან გასული წლის პირველ თებერვალს გაათავისუფლეს. ზოდელავას თქმით, იმ შემთხვევაში, თუ მუზეუმის დირექტორი უზენაესი სასამართლოს გადაწყვეტილებას არ აღასრულებს, ის ბრძოლას გააგრძელებს და საქმეს სააღსრულებლო ბიუროს გადასცემს