დიპლომატიური კორპუსი კრიტიკულად აფასებს იმ არათანაბარ გარემოს, რომელშიც საპრეზიდენტო არჩევნები ჩატარდა.
მორიგი განცხადებები დღეს გაეროსა და შვედეთის ელჩებმა გააკეთეს. ისინი შეშფოთებულები არიან გამოვლენილი ხარვეზებით და დარღვევებით. დიპლომატების განცხადებით, შეფასებები დაფუძნებულია საერთაშორისო სადამკვირვებლო მისიების მიგენებებზე.
„გაერთიანებული ერების ორგანიზაციის სახელით მინდა მივულოცო სალომე ზურაბიშვილს. ის არის პირველი ქალი პრეზიდენტი საქართველოში. მიუხედავად ამისა ჩვენ საკმაოდ შეშფოთებულები ვართ იმ დარღვევებით, რომელთა შესახებ ვრცელდება ინფორმაცია. განსაკუთრებით ეს არის სამწუხარო ქვეყანაში, რომელიც მიისწრაფის დემოკრატიის სტანდარტებისკენ. შესაძლო დარღვევები დეტალურად იყო აღწერილი, როგორც საერთაშორისო, ასევე ადგილობრივი ორგანიზაციების ანგარიშებში. ეს დარღვევები ეხებოდა მედია თავისუფლებას, ადმინისტრაციული რესურსების გამოყენებასა და ასევე პოლიტიკურ პარტიასა და სახელმწიფოს შორის საზღვრების წაშლას,“ – განაცხადა გაეროს ელჩმა საქართველოში ლუიზა ვინტონმა.