ლიხაურის ქუჩაზე მდებარე სასტუმროში ჩატარებული სპეცოპერაციისას დაკავებული "დონბაისის" წევრის ლუკა ჩხეტიას ოჯახი დარწმუნებულია, რომ მას იარაღი ჩაუდეს. ლუკა ჩხეტიას მამა აცხადებს, რომ მისი შვილი თანამებრძოლებთან ერთად გაერთიანებული ოპოზიციის აქციაზე მონაწილეობის მისაღებად ჩამოვიდა, თუმცა მას და მის მეგობრებს იარაღი ჩაუდეს და დააკავეს.
„დაგვირეკეს დღეს, რომ დაკავებული არის. დაუდეს ნაღდად იარაღი. ლუკას იარაღი არ ჰქონდა და არც ექნებოდა და არც ჰქონდა საჭიროება იმის, რომ იარაღით ხელში გამოსულიყო. დღეს მითუმეტეს აქციებზე. ჩამოვიდა უკრაინელ ძმებთან ერთად რომ გაეზიარებინა, დაემტკიცებინა ეს მთავრობა რომ ეს მოვიდა ძალით , ფულით, ყოველნაირი უბედურებით. არ უნდოდა და დაუდგა გვერდით. უკრაინაში იბრძოდა დონბასის ბატალიონში ვაჟკაცურად. სასირცხვილო არაფერი არ გაუკეთებია. პირიქით უნდა დაუდგეს მთავრობა, რომ ასეთი ვაჟკაცი და ასეთ რაღაც ლაჩრობას ჩადიან. იარაღს უდებენ,“-აცხადებს ლუკა ჩხეტიას მამა სერგო ჩხეტია.
ლუკა ჩხეტიას ოჯახი მის გათავისუფლებას ითხოვს. ისინი ამბობენ, რომ შსს-სგან მსგავს ქმედებას ელოდებოდნენ.
„მათ ეს გააკეთეს დაგეგმეს, იქექებოდნენ ჩვენ ფეისბუქ გვერდებზე. ეძებდნენ, ვერაფერი ვერ იპოვეს. ვიცით ეს ყველაფერი. ჩვენ ველოდებოდით რომ ჩემ ძმას ამას გაუკეთებდნენ,“-განაცხადა ლუკა ჩხეტიას დამ მარინა ჩხეტიამ.
ლიხაურის ქუჩაზე ჩატარებული სპეცოპერაციისას სპეცრაზმმა სასტუმროდან უკრაინის 5 მოქალაქე აიყვანა. დაკავებულთა შორის, სავარაუდოდ, არის ბატალიონ "დონბასის" წევრი ლუკა ჩხეტიაც.