ძლიერი ქარის გამო ზუგდიდის მუნიციპალიტეტში პრობლემები შეიქმნა. ამ დროის მონაცემებით, 20-ზე მეტი კერძო საცხოვრებელი სახლი, დევნილთა ოთხი საერთო საცხოვრებელი და ოთხი საჯარო სკოლა, ასევე განმუხურში მდებარე ამფითეატრი მნიშვნელოვნად დაზიანდა.სტიქიამ ასევე დააზიანა ელექტროგადამცემი ხაზები, რის გამოც ელექტროენერგია არ მიეწოდებოდა სოფლების უმეტესობას. ადგილზე „ენერგო-პრო ჯორჯიას“ წარმომადგენლები მუშაობენ. შესაბამისი სამუშაოების შემდეგ, ამჟამად ელექტროენერგიის მიწოდება 20-ზე მეტ სოფელშია აღდგენილი, დარჩენილია კიდევ რამდენიმე სოფელი.სტიქიამ მოგლიჯა მრავალწლოვანი ხეები და გარე განათების ბოძები. ქარის მიერ მიყენებულ ზარალს სპეციალური კომისია შეისწავლის