„სიტყვებიც არ მყოფნის, როგორ აღვწერო დღევანდელი დღე, მეზიზღება. ისეთ დღეში ვარ, ვერც სახლში ვჩერდები, ვერც გარეთ. დილით საფლავზე ვიყავი ასული, შუადღესაც ავალ და საღამოსაც. დღევანდელი დღე ჩემთვის სიკვდილის ტოლფასია“- განაცხადა ზაზა სარალიძემ. დღეს დათუნა სარალიძის ტრაგიკული გარდაცვალებიდან ერთი წელი გავიდა.მიუხედავად იმისა, რომ ხორავას ქუჩის ტრაგედიიდან დღეს ერთი წელი გავიდა, მისი მოთხოვნები ამ დრომდე არ დაუკმაყოფილებიათ და ხელისუფლება მკვლელებს მფარველობს.
„ტრაგედიიდან ერთი წელი გავიდა და არანაირი შედეგი არ არის, ფეხებზე კიდიათ, დაგვცინიან. საქართველო საქართველო კი აღარ არის, სასაკლაოა. არანაირი კანონის უზენაესობა არ არის, მკვლელებს მფარველობენ ბოლომდე და კბილებით იცავენ.
დათუჩას წლისთავი ხვალ არის, იმიტომ, რომ ერთი დღე იცოცხლა საცოდავმა. დღეს, 14:00 საათისთვის შევიკრიბებით რუსთაველის გამზირზე და მსვლელობით ავალთ ტრაგედიის ადგილზე, ხორავას ქუჩაზე, ორივე ბავშვის სულს პატივი რომ მივაგოთ“, – განაცხადა სარალიძემ.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა.