საქართველოს მესამე პრეზიდენტი, მიხეილ სააკაშვილი მხარდამჭერებს სამოქმედო გეგმის დასახვის მიზნით ფილარმონიაში მისვლისკენ მოუწოდებს.

 

მიხეილ სააკაშვილი საპრეზიდენტო არჩევნების მეორე ტურის შედეგებსა და გამოვლენილ დარღვევებზე საუბრობს. მესამე პრეზიდენტის თქმით, აუცილებელია მოხდეს ამომრჩეველთა ხმების დაცვა. სააკაშვილის განცხადებით, გაერთიანებული ოპოზიციის წარმომადგენლებთან ერთად მოსახლეობამ უნდა გადაწყვიტოს, რას მოიმოქმედებს.

 

მისივე თქმით, დღეს გადამწყვეტი პერიოდია ქვეყნისთვის და სწორედ ახლა მოქმედების დროა.

 

„18:00 საათზე, თბილისის დროით, ვიკრიბებით ფილარმონიაში. მე მინდა ვუთხრა ხალხს, ახლა არ არის გლოვის და თავზე ნაცრის დაყრის დრო. ახლა არის ორგანიზების და ბრძოლის გაგრძელების და უფრო ინტენსიურ ფაზაში გადაყვანის დრო. ჩვენ ვკარგავთ ჩვენს სამშობლოს, ასე, რომ მე დარწმუნებული ვარ, რომ ახლა არა მხოლოდ ხელების ჩამოშვების დრო არ არის, დგება გადამწყვეტი პერიოდი. 18:00 საათზე ფილარმონიაში გაერთიანებული ოპოზიცია იმსჯელებს, მეც შემოგიერთდებით სკაიპით, ჯერჯერობით, და ზუსტად გავწეროთ ყველამ ერთად, მოვიფიქროთ, სად მივდივართ შემდეგ ეტაპზე,“ – განაცხადა მიხეილ სააკაშვილმა.

 

საპრეზიდენტო არჩევნების მეორე ტურის წინასწარი მონაცემების თანახმად, სალომე ზურაბიშვილს 59,6 %, გრიგოლ ვაშაძეს 40,4 % აქვს.

 

ცესკო-მ ხმების თითქმის 100 პროცენტი უკვე დათვალა. წინასწარი მონაცემებით, კანდიდატებს შორის სხვაობა თითქმის 20 პროცენტია.