ზუგდიდს ახალი სახანძრო-სამაშველო შენობა 2019 წელს ექნება. მშენებლობის პროცესი ივლისში დასრულდება. ამის შესახებ ინფორმაციას საგანგებო სიტუაციების მართვის სამსახური ავრცელებს. ტენდერში შპს „იმერეთმა“ გაიმარჯვა, რომელთანაც უწყებამ ხელშეკრულება 31 ოქტომბერს დადო. სააგენტოს ინფორმაციით, თანამედროვე სტანდარტების შენობა მრავალფუნქციური იქნება და რეგიონულ სასწავლო ცენტრის ფუნქციასაც შეასრულებს.შენობას შესაძლებლობა ექნება მიიღოს სამაშველო ვერტმფრენი.პროექტის ღირებულება 3 მილიონი ლარია.
საგანგებო სიტუაციების მართვის და სახანძრო სამაშველო სამსახურისთვის შენობის მშენებლობა 2012 წელს „ერთიანი ნაციონალური მოძრაობის“ ხელისუფლებაში ყოფნის დროს დაიწყო, როგორც პარტიაში აცხადებენ, მშენებლობა 2015 წელს უნდა დასრულებულიყო,თუმცა ქართული ოცნების ხელისუფლებაში მოსვლის შემდეგ ადგილობრივ ბიუჯეტში აღნიშნული მშენებლობისთვის განკუთვნილი თანხა, ოცნების ხელისუფლებამ ადგილობრივი ჩინოვნიკების ხელფასებზე, პრემიებზე და დანამატებზე დახარჯა.