გაუგონარ თაღლითობას აქვს ადგილი ცესკოს მხრიდან, მთავარი თაღლითი არის თამარ ჟვანია, – ამის შესახებ პრეზიდენტობის კანდიდატის გრიგოლ ვაშაძის საარჩევნო შტაბის ხელმძღვანელმა გიორგი ვაშაძემ ცესკოში განაცხადა, სადაც სხდომაზე დასასწრებად მივიდა, თუმცა, სხდომა გადაიდო.
„ყველანი მოვედით სხდომაზე დასასწრებად და გზაში ჟურნალისტმა დამირეკა, რომ სხდომა გადაიდო. სამარცხვინოა, ცენტრალური საარჩევნო კომისია ჩვეულებრივ თაღლითურ ორგანიზაციად ჩამოყალიბდა. მთავარი თაღლითი არის თამარ ჟვანია, რომელიც ასრულებს ყველა დავალებას, რასაც "ქართული ოცნების" შტაბიდან იღებს. ეს მათ ვერ უშველით. მითუმეტეს, დღეს გამოქვეყნდა "ედისონ რისერჩის" კვლევები, სადაც 12%-ით იგებს გრიგოლ ვაშაძე. გამარჯვებას ვერ გამოგვტაცებენ ამ თაღლითური სქემებით ვერც ერთ შემთხვევაში", – განაცხადა ვაშაძემ.
როგორც ცნობილია, ცესკო-ში სხდომა, სადაც არჩევნების მეორე ტურის თარიღი უნდა გამოეცხადებინათ, 19:00 საათამდე გადაიდო ისე, რომ საარჩევნო კომისიაში განმარტებები არ გაკეთებულა.
ოპოზიციაში ფიქრობენ, რომ ცესკო ხელისუფლებასთან შეთანხმებით არჩევნების დანიშვნას 28 ნოემბერს, შუა კვირაში აპირებს.