„ქაჯეთის ციხე“- ამ ტრანსპარანტით ხელში მოქალაქე თეონა ქარდავამ მერიის წინ პროტესტის ნიშნად აქცია გამართა. ის მერიას მოქალაქეების მიმართ უყურადღებობასა და მათი პრობლემების უგულებელყოფაში ადანაშაულებს და ამბობს, რომ მერის მოვალეობის შემსრულებელი მაიზერ ნანავა არის არაადეკვატური და აბუჩად იგდებს მოქალაქეებს. „მე გამოვხატე პროტესტი 2 დღის, მერიის ანგარიშზე მოვიტანე პოლიეთილენის ბრიზენტი, ეს იმიტომ, რომ ჩვენ, დევნილები სტიქიის შედეგად დავზარალდით და ვითხოვდით შენობის გადახურვას, სწორედ ნანავამ მოგვიტანა მაშინ ეს ბრიზენტი და კიდევ ამბობს, 5 % გიჟიაო. 5 კი არა ყველა გიჟები ვართ ამათ ხელში“- განაცხადა ქარდავამ. ის ცენტრალურ ხელისუფლებას მაიზერ ნანავას გადაყენების მოთხოვნით მიმართავს და ამბობს, რომ არჩევნების მეორე ტურშიც დამარცხება გარდაუვვალია, თუ ისევ ეს ხალხი დარჩა ხელისუფლებაში. მერიაში ქარდავას ბრალდებებს არ პასუხობენ, უწყებაში განმარტებები არ გაკეთებულა.