ქართული ოცნების“ ოფისში დღეს დილიდან დახურული შეხვედრები მიმდინარეობს. როგორც „რუსთავი 2“-თან საუბრისას პარტიის წევრი და საკრებულოს დეპუტატი ბექა დავითულიანი აცხადებს, შეხვედრას პარტიის პოლიტსაბჭოს წევრები და თავმჯდომარე მართავენ.
მისი თქმით, პარტიის ლიდერები შეხვედრაზე მეორე ტურის სამზადისზე მსჯელობენ.
„მიმდინარეობს მსჯელობა მეორე ტურთან დაკავშირებით, ჩვენ მოქალაქეებისგან მივიღეთ გზავნილი, რასაც სჭირდება შესაბამისი პასუხი,“ – ამბობს დავითულიანი.
რაც შეეხება საპარლამენტო უმრავლესობის წევრის, გედევან ფოფხაძის განცხადებას, რომ მეორე ტურში გრიგოლ ვაშაძის გამარჯვების შემთხვევაში სამოქალაქო ომი დაიწყება, დავითულიანი ამბობს, რომ ოპონენტები ხელისუფლებაში მოსვლას დესქტრუქციული გზებით ცდილობენ.
„ჩვენ ვიცით, რომ ჩვენი ოპონენტების მართვის სტილი, მათი პოლიტიკური ამოცანა არის დესტრუქციული გზებით ხელისუფლებაში მოხვედრა, თუმცა ჩვენ ამას არ დავუშვებთ,“-ამბობს დავითულიანი.
შეკითხვაზე, სწორად მიაჩნია თუ არა, საპრეზიდენტო კანდიდატის, სალომე ზურაბიშვილის გზავნილი, რომ არჩევნების მეორე ტური ეს არ არის, ბრძოლა ორ კანდიდატს შორის, არამედ ეს არის ბრძოლა ორ საქართველოს შორის დავითულიანი პასუხობს: „საქართველო ერთია, მეორეს შექმნას თქვენი მეგობრები ცდილობენ“.
საკრებულოს უმრავლესობის წევრს „რუსთავი 2“-ის ჟურნალისტმა ასევე ჰკითხა „საერთაშორისო გამჭვირვალობა-საქართველოს“ განცხადებაზე, სადაც ნათქვამია, რომ სალომე ზურაბიშვილის სასარგებლოდ „ქართულმა ოცნებამ“ უკანონო შემოწირულობა გაიღო, როცა პარტიამ დაუკვეთა „ფსიქო პროექტი“ და თანხა გადაუხადა კოორდინატორებს.
დავითულიანი ამბობს, რომ ეს არაკანონიერი შემოწირულობა არ არის და თუ აუდიტის სამსახური ჩათვლის, რომ ეს კანონიერი ქმედება არ იყო, შესაბამის განცხადებასაც გააკეთებს.