ზუგდიდის საკრებულოს თავმჯდომარე მამუკა წოწერიამ კომენტარი გააკეთა ტყაიის რწმუნებულთან დაკავშირებით, მისი თქმით, საკითხს შიდა აუდიტის სამსახური შეისწავლის და მხოლოდ ამის შემდეგ მოხდება პასუხის გაცემა ედემ კეკუტიას არაეთიკურ ქმედებებზე არჩევნების დღეს უბანში."მე ვუხდი საზოგადოებას ბოდიშს, თუ ეს მართლა მოხდა, კადრები არ მინახავს, მაგრამ ვურჩევ კეკუტიას ბოდიში მოუხადოს ამომრჩეველს"- განაცხადა წოწერიამ.ზუგდიდის მუნიციპალიტეტის მერიას ტყაიაში არჩევნების დღეს სოფლის რწმუნებულის ქმედებასთან დაკავშირებით ჯერჯერობით ზომები არ მიუღია. საუბარია ტყაიის 71- ე უბანზე სოფლის გამგებლის ქმედებაზე, რომელიც 28 ოქტომბერს უბანზე ნასვამი მივიდა და იგინებოდა. ედემ კეკუტიას მიერ ამომრჩეველზე ზეწოლისა და ოპოზიციური პარტიების წარმომადგენლების მისამართით გამოთქმული გინებისა და ქმედებების ამსახველი ვიდეო ნაციონალური მოძრაობის დამკვირვებელმა ტელეფონით გადაიღო და სააგენტოებს გადასცა.