უმრავლესობის დეპუტატის განცხადება, რომ გრიგოლ ვაშაძის გამარჯვებას მოჰყვება სამოქალაქო ომი, არის დანაშაულის ნიშნების შემცველი, – ასე აფასებს ფრაქცია "ნაციონალური მოძრაობის" თავმჯდომარე რომან გოცირიძე გედევან ფოფხაძის განცხადებას, რომლის თანახმადაც, თუ არჩევნებს გრიგოლ ვაშაძე მოიგებს, ეს იქნება რეალური ნაბიჯი სამოქალაქო ომის დაწყების თვალსაზრისით.
მისი თქმით, ხელისუფლების მშვიდობიანად გადაცემა დიდი ნაბიჯია ქვეყნის დემოკრატიული განვითარების გზაზე.
„უმრავლესობის დეპუტატის განცხადება, რომ გრიგოლ ვაშაძის გამარჯვებას მოჰყვება სამოქალაქო ომი, არის დანაშაულის ნიშნების შემცველი. მმართველი უმრავლესობა დაუყოვნებლივ უნდა გაემიჯნოს ამ განცხადებას, ხოლო დეპუტატმა ბოდიში უნდა მოიხადოს ამომრჩევლის წინაშე",- განაცხადა გოცირიძემ.
„თუ გრიგოლ ვაშაძე მოიგებს არჩევნებს, ეს იქნება რეალური ნაბიჯი საქართველოში სამოქალაქო ომის დაწყების თვალსაზრისით“, – ამის შესახებ საპარლამენტო უმრავლესობის წევრმა გედევან ფოფხაძემ ჟურნალისტებს განუცხადა. როგორც მან აღნიშნა, ამის თქმის საფუძველს „ნაციონალური მოძრაობის" განწყობა აძლევს, რომელიც მერაბიშვილის და ახალაიას ციხიდან გამოყვანას და ასევე მიხეილ სააკაშვილის საქართველოში ჩამოყვანას უკავშირდება.