ყველა სიმპტომი და პროცესის მიმდინარეობა ადასტურებს იმას, რომ ხელისუფლებას ძალიან უჭირს. ამის ნიშანია მრავალრიცხოვანი დარღვევები, რომელიც ხდება უბნებზე – ამის შესახებ განცხადება, ”ევროპული საქართველო – მოძრაობა თავისუფლებისთვის” თავმჯდომარე, საქართველოს პრეზიდენტობის კანდიდატმა, დავით ბაქრაძემ, საარჩევნო პროცესის შეფასებისას გააკეთა.

 

ბაქრაძის თქმით, ხელისუფლება ნერვიულობს, რადგან არსებობს ძალიან მაღალი მოლოდინი იმისა, რომ ოპოზიცია გაიმარჯვებს.

 

„ეს ყველაფერი ნიშნავს იმას, რომ ხელისუფლება ნერვიულობს და ძალიან საფუძვლიანად ნერვიულობს იმის თაობაზე, რომ ამ არჩევნებზე რეალურად, არსებობს ძალიან მაღალი მოლოდინი და ალბათობა ოპოზიციის გამარჯვების. მიუხედავად ყველა ამ დარღვევის, მე მინდა მივმართო ჩვენს ამომრჩეველს, პირველ რიგში მადლობა ვუთხრა თითოეულ იმ ადამიანს, ვინც უკვე მივიდა და გამოხატა საკუთარი პოზიცია უკეთესი  და საიმედო დღის სასარგებლოდ,“ – განაცხადა დავით ბაქრაძემ.

 

საპრეზიდენტო კანდიდატი იმ ადამიანებსაც მიმართავს, ვინც ჯერ არჩევნებზე არ მისულა და საკუთარი არჩევანი არ დაუფიქსირებია. მან მოქალაქეებს მოუწოდა მივიდნენ არჩევნებზე და საკუთარი ხმა დააფიქსირონ.