სუპერმარკეტების ქსელის „ფრესკოს“ დამფუძნებელმა ვასილ სოფრომაძემ დღეს ხელისუფლება ფულის გამოძალვაში დაადანაშაულა.
ფინანსთა სამინისტრომ მილიონი ლარით დააჯარიმა, პარალელურად ფინანსთა სამინისტრომ ბიზნესმენის მთელი ქონება და ყველა ანგარიში დააყადაღა.
ვასილ სოფრომაძე ამბობს, რომ ფორსირებული შეტევა მის ბიზნესზე და პირადად მასზე, ხელისუფლებამ წინასაარჩევნოდ დაგეგმა.
ბიზნესმენის თქმით, ხელისუფლებამ სუპერმარკეტების ერთ-ერთ მსხვილი ქსელის დევნა, სამი წლის წინ დაიწყო, ხოლო მილიონიანი ჯარიმა ბიზნესზე ზეწოლის ფინალი იყო.
თავდაპირველად ვასილ სოფრომაძეს ბიზნესის გასხვისება ან ბაზრის სხვა მოთამაშეებთან გაერთიანება შესთავაზეს. "ფრესკოს" წინააღმდეგ ბრძოლა სოფრომაძის მტკიცებით, სუპერმარკეტების ქსელის საფასო პოლიტიკამ განაპირობა.
"ფრესკოს" დამფუძნებლის სკანდალური განცხადების შესახებ სოფრომაძის პრესკონფერენციიდან შეიტყო ბიზნესომბუდსმენმა. ირაკლი ლექვინაძის ინფორმაციით, მილიონი ჯარიმა „ფრესკოს“ მფლობელს შეუძლია გაასაჩივროს.
სოფრომაძის განცხადებით, ფინანსთა სამინისტრო მას უმტკიცებს, რომ შვიდი წლის წინ არ განაბაჟა ავტომობილი. თუმცა 2011 წელს შეძენილი მანქანა სამინისტროს შვიდი წლის შემდეგ გაახსენდა და სადავო 3 ათასი ლარის გამო მრავალმილიონიანი ქონება დაუყადაღა.
„ფრესკოს“ მფლობელი ფინანსთა სამინსიტროს მთავარ პროკურატურაში უჩივის. ირკვევა, რომ მილიონიანი ჯარიმა შემოსავლების სამსახურმა „ფრესკოს“ იმ პროდუქციის გამო დააკისრა, რომელიც სუპერმარკეტების ქსელმა დანაკარგად გაწერა, თუმცა პროდუქციაზე რომელიც „ფრესკოს“ არ გაუყიდია ფინანსთა სამინისტრო ბიზნესმენს მოგების გადასახადს სთხოვს.
მთავარ პროკურატურაში შეტანილ საჩივრის პარალელურად, „ფრესკოს“ დამფუძნებელი ფინანსთა მინისტრისთვის გაგზავნილი წერილის პასუხის მოლოდინშიცაა, სადაც სოფრომაძე დეტალურად აღწერს იმ ვითარებას, რამაც შესაძლოა, მისი ბიზნესი დრამატულად დააზიანოს.