„ჩვენ უნდა ვიმოქმედოთ პრინციპით – კონსენსუსით, ყველა მინუს ერთი, ყველა მინუს ივანიშვილი, ეს მონსტრი, ერთ-ერთი ყველაზე დიდი უბედურება, რაც საქართველოს ჰქონია,“- ეს განცხადება, მიხეილ სააკაშვილმა „კვირის აქცენტების“ პირდაპირ ეთერში გააკეთა.
მან ხელისუფლებაში მოსვლის შემთხვევაში საკუთარ გეგმებზე ისაუბრა და აღნიშნა, რომ რევანშს არ აპირებს.
„ხმები არ არის ყმები, მით უმეტეს, ფეოდალის ყმები. ვიცი, რომ თქვენ გაშინებენ, მათ შორის ის ხალხი, ვინც ივანიშვილთან ტანგოს ცეკვავს სახიფათოს, რომ სააკაშვილი ამუნია, რევანშისტი, დაბრუნება, ყველას ყოფას უტირებს, დაერევა. დარევა და ბოღმა ამათი ძირითადი გზავნილი. მე მართლაც ვაპირებ განვახორციელო რევანში თქვენთან ერთად, მაგრამ ჩვენი რევანში სწრაფად განვითარებადი საქართველო,“- განაცხადა მიხეილ სააკაშვილმა.
საქართველოს მესამე პრეზიდენტი ბიძინა ივანიშვილის მიერ ჟურნალისტებთან შეხვედრისას გაკეთებულ განცხადებებს გამოეხმაურა. სააკაშვილის თქმით, საპრეზიდენტო არჩევნებში „ქართული ოცნების“ მიერ მხარდაჭერილი კანდიდატის გამარჯვება ქვეყნისთვის ძალიან ცუდი ფაქტი იქნება. მისი განცხადებით, სალომე ზურაბიშვილი რუსეთის ინტერესებს ატარებს. „ნაციონალური მოძრაობის“ ლიდერმა იმ კონკრეტულ მოვლენებზე ისაუბრა, რაც შესაძლოა, ზურაბიშვილის არჩევნებში გამარჯვებას მოჰყვეს.
„სტატისტიკურად გია ვაშაძის დამარცხება შეუძლებელია. თუ მან წელში გადაგვტეხა, თუ მან გააბახა ქართული საზოგადოება, ჯაყო გაითამაშა და მთელი ქართულ საზოგადოება მარგოდ და თემურად აქცია, ეს ნიშნავს, რომ საქართველოში შემდეგი რაღაცები მოხდება, ეს ნიშნავს, რომ ჩვენ წავაგებთ საქმეს ჰააგაში ტერიტორიულ დავებთან დაკავშირებით, ნიშნავს, რომ ჩვენს ოფიცრებს, ანწუხელიძე და ტატუნაშვილი რომ ყოფილიყვნენ ცოცხლები მათაც გაასამართლებდნენ. ეს ნიშნავს, რომ საქართველო საერთაშორისო სამართლის თვალში დაკარგავს უფლებას და რუსეთის გეგმა განხორციელდება,“- განაცხადა მიხეილ სააკაშვილმა.