ოპოზიცია ივანიშვილის გუშინდელ ინტერვიუს მწვავე კრიტიკით ეხმაურება.
"ივანიშვილი შეეცადა ამ ინტერვიუთი დაერწმუნებინა განაწყენებული ამომრჩეველი მხარი კვლავ "ქართული ოცნებისთვის" დაეჭირა, თუმცა უშედეგოდ," – ასე გამოეხმაურა ოპოზიცია „ქართული ოცნების“ თავმჯდომარის განცხადებას საპრეზიდენტო არჩევნებთან დაკავშირებით.
პოლიტიკოსები მიიჩნევენ, რომ ივანიშვილს სურვილი აქვს მისთვის სასურველ შედეგს პირველ ტურში მიაღწიოს, თუმცა მათი თქმით, ყოფილი პრემიერი ხვდება რომ მმართველ ძალას ამის რესურსი აღარ გააჩნია.
„რეალურად ხომ იციან, რომ მეორე ტური გარდაუვალია, ამიტომ ცდილობს ივანიშვილი, რომ მაქსიმალური მობილიზაცია გააკეთონ, თუმცა მე შევახსენებ ბიძინა ივანიშვილს, რომ მეორე ტურში სალომე ზურაბიშვილს მხარდამჭერების მომატების რეალური შანსი არ აქვს,“-ამბობს „ნაციონალური მოძრაობის“ ერთ-ერთი ლიდერი, ზაალ უდუმაშვილი.
"ევროპულ საქართველოში“ აცხადებენ, რომ ივანიშვილს სურს ყველაფერი პირველსავე ტურში დაამთავროს, თუმცა ეს შეუძლებელია.
„მე მგონი ეს შეუძლებელია და ქართველი ხალხის შესაბამის პასუხს გასცემს ივანიშვილს და მისი გუნდის თავხედურ საქციელს,“-ამბობს ირაკლი კიკნაველიძე.
არასაპარლამენტო ოპოზიციის წევრი დავით უსუფაშვილი ამბობს, რომ ივანიშვილი ეთერში გამოჩენით შეეცადა დაერწმუნებინა იმედგაცრუებული ამომრჩეველი, თუმცა „შენების მოძრაობის“ ლიდერი ფიქრობს, რომ ეს ვერ მოხერხდება.