პროკურატურას ხმაურიან საქმეზე ბრალის წარდგენა ბოლო დროის სკანდალებიდან საზოგადოების ყურადღების გადასატანად დასჭირდა

0
368
იურისტები ვარაუდობენ, რომ პროკურატურას ხმაურიან საქმეზე ბრალის წარდგენა ბოლო დროის სკანდალებიდან საზოგადოების ყურადღების გადასატანად დასჭირდა
 
„ახალგაზრდა იურისტთა ასოციაციის” თავმჯდომარის, სულხან სალაძის შეფასებით, ბადრი პატარკაციშვილის საქმეზე ახლა მიმდინარე პროცესთან დაკავშირებით არსებობს ერთი შეკითხვა, თუ რატომ მოხდა კუდ-ის ყოფილი მაღალჩინოსნებისთვის ბრალის წაყენება მაშინ, როცა 2016 წელს ექსპერტიზის დასკვნა უკვე დაიდო და სასამართლოს გადაწყვეტილებაც მიღებულია.
 
„ცხადია, ყველა საქმეზე უნდა იყოს როგორც დასკვნა, ისე სასამართლოს გადაწყვეტილება, მაგრამ რატომ ახლა, ეს კითხვა არის აბსოლუტურად ლეგიტიმური”,- აღნიშნა სულხან სალაძემ.
 

გიორგი მერებაშვილის ადვოკატების თქმით, დაცვის ქვეშ მყოფისთვის წაყენებული ბრალდება აბსურდულია. მათი განცხადებით, საქმის მასალებში არსებობს აუდიოჩანაწერი, თუმცა მასში დანაშაულის ნიშნები არ იკვეთება. 
 
„ბრალეულობას ვერ ვხვდებით, რაში გამოიხატა, ბრალი არის დანაშაულის მომზადებაზე, რაც გულისხმობს გარკვეული პირობების შექმნას ამ დანაშაულის ჩადენისთვის, არ არის გამოხატული კონკრეტული ქმედებები, რა განახორციელეს აღნიშნული დანაშაულის ჩადენისთვის შესაბამისად, ვთვლი, რომ დანაშულის ნიშნები არ არსებობს,“- განაცხადა ადვოკატმა, ქეთი მირიანაშვილმა.
 
ბადრი პატარკაციშვილის მკვლელობის მომზადების ფაქტზე ბრალი პროკურატურამ კუდ-ის ყოფილ მაღალჩინოსნებს – ლევან ქარდავას, რევაზ შიუკაშვილსა და გიორგი მერებაშვილს წაუყენა.
 
სამი ბრალდებულიდან საგამოძიებო უწყების წარმომადგენლებმა მხოლოდ მერებაშვილი დააკავეს, რომლის მიმართაც აღკვეთის ღონისძიების შეფარდების საკითხზე სასამართლო დღეს იმსჯელებს.
 
რაც შეეხება დანარჩენ ორ ბრალდებულს, ლევან ქარდავას და რევაზ შიუკაშვილს, მათ სისხლის სამართლის სხვა საქმეებზე პატიმრობა უკვე შეფარდებული აქვთ.

წინა სტატიასაქართველოს პროკურატურა აცხადებს, რომ გახსნილია ბადრი პატარკაციშვილის მკვლელობის მომზადების ფაქტი
შემდეგი სტატიაარასამთავრობო ორგანიზაციების წარმომადგენლებმა ვაშინგტონში აშშ სახელმწიფო დეპარტამენტსა და მარშალის ფონდში შეხვედრები გამართეს
ტელეკომპანია ოდიშის საინფორმაციო სამსახური