ხმაური იყო დღეს ზუგდიდის კულტურის სახლში, სადაც ქორეოგრაფიული ანსამბლ „თუთარჩელას“ მოცეკვავეები და მშობლები დარბაზში შესვლას ითხოვდნენ. შეკრებილები აცხადებდნენ, რომ აქ თითქმის 12 წელი რამდენიმე ანსამბლი რეპეტიციებს გადიოდა, თუმცა მას შემდეგ, რაც მერიამ ზუგდიდის თეატრი შეიყვანა, შენობაში მოცეკვავეებს რეპეტიციების ჩატარების უფლება არ მისცეს.
კულტურის სახლი დირექტორი ნატო გელენავა აცხადებს, რომ თეატრი შენობაში დროებით იყო განთავსებული, თუმცა ბავშვებს კარი მიუხურეს და შესვლის უფლება არ მისცეს. გელენავამ სიტუაციის გამწვავებაში ყოფილი ვიცე-მერი გია გულორდავა და მისი მეუღლე დაადანაშაულა.მოგვიანებით მშობლები და ბავშვები შეძახილებით დარბაზში შევიდნენ, სადაც თეატრის დასი რეპეტიციებს გადიოდა. ხმაური უკვე დარბაზში გაგრძელდა.
დაპირისპირებულმა მხარეებმა მოლაპარაკებები დახურულ კარს მიღმა მერის მოვალეობის შემსრულებლის მოსვლის შემდეგ დაიწყეს, მაიზერ ნანავას მოთხოვნით, შეხვედრას ნატო გელენავა არ დასწრებია, ის ნანავამ დარბაზიდან გააძევა. შეხვედრის დასრულების შემდგომ ჟურნალისტებთან კომენტარი მერიის პრესსამსახურმა გააკეთა, უწყების ინფორმაციით, კულტურის სახლი თეატრის დასს კანონიერად დაეთმო და ქორეოგრაფები ამის შესახებ გაფრთხილებულები იყვნენ.სანამ მერია ანსამბლებისთვის ალტერნატიულ ფართს იძიებს, ქორეოგრაფები 500-მდე მოზარდის რეპეტიციების გავლას ღია ცის ქვეშ აპირებენ.