რუსთაველზე პარლამენტის წინ შვილმკვდარი მამების აქციაზე გუშინ მორიგი დაპირისპირება მოხდა – სამართალდამცველებმა აქციის მონაწილეებს ბანერების საშუალებით კარვის კონსტრუქციის გაშლის უფლება არ მისცეს.
აქციის მონაწილეები პოლიციას ძალის გადამეტებაში ადანაშაულებენ და ტერიტორიაზე ბანერების განთავსებას ითხოვენ.
"წინაზე როდესაც კარვები წაგვართვა პოლიცია განმარტება მოგვცეს ასეთი რომ კარვებში ჩვენ ვერ ვაკონტროლებთ სიტუაციას. სპეციალურად შევიმუშავეთ ისეთი გეგმა, რომ პოლიციისთვისაც ყოფილიყო კონტროლირებადი, წინა ფასადი არ იყო დახურული, სრულიად შეეძლოთ ეკონტროლებინათ, მაგრამ ამჯერად თავიანთ მოთხოვნასაც გადააბიჯეს,"-აცხადებს ზაზა სარალიძე.
აქციას მოგვიანებით ამერიკიდან ჩამოსული პოლიტიკური კონსულტანტიც შეუერთდა, მან ზაზა სარალიძესა და მალხაზ მაჩალიკაშვილს პლედები, წყალი და საკვები პროდუქტები გადასცა და მედიასთან შვილმკვდარი მამებისთვის გამოხატვის თავისუფლების შეზღუდვაზე ისაუბრა. ქრისტინა პუშოუმ პოლიციელთა რეაგირება დანაშაულად შეაფასა.
"ძალიან გაკვირვებული ვართ პოლიციის ქმედებით. უცნაურია რომ აქტივისტების ასეთი მცირე ჯგუფის წინააღმდეგ აქ ამდენი პოლიციელია მობილიზებული. ხშირად მსმენია რომ სააკაშვილის დროს საქართველოში არ იყო სიტყვის თავისუფლება. მე არ მგონია, რომ ახლა სიტყვის თავისუფლება არსებობს თქვენს ქვეყანაში. ვერ ვხვდები, როგორ შეიძლება ვამტკიცო, რომ საქართველოში ნამდვილი დემოკრატიაა და ამ მხრივ აქ ყველაფერი კარგადაა,"-აცხადებს ქრისტინა პუშოუ
ცნობისათვის : ,ქრისტინა პუშოუ აშშ-ის მოქალაქეა და ფლობს საქართველოს დროებითი ბინადრობის მოწმობას. იგი PR კონსულტაციებს უწევს პოლიტიკოსებს/პოლიტიკურ ჯგუფებს – როგორც ბრენდინგში, ისე კონკრეტული საკითხების ლობირებაში, არის Politiacl Vanguard-ში პოლიტიკური კონსულტანტი. . წერს საერთაშორისო პოლიტიკასა და თავისუფალი ბაზრის ეკონომიკაზე. ქრისტინა პუშოუ კარგად იცნობს საქართველოს შიდა პოლიტიკას და საქართველოს ოკუპირებულ ტერიტორიებზე არსებულ ვითარებას, წერს ვიდეობლოგებს საქართველოზე და მაყურებელს მიმდინარე პოლიტიკის შეფასებებს სთავაზობს. აცხადებს, რომ მისი აზრი ყოველთვის არ ემთხვევა საქართველოს მთავრობის პოზიციებს და რომ ეს მისი კერძო, ექსპერტული შეფასებებია.