საქართველოს პარლამენტის თავმჯდომარის მოადგილე, ფრაქცია ”ქართული ოცნების” წევრი, გიორგი ვოლსკი  ეხმაურება Edison Research-ის ბოლო კვლევას, რომლის მიხედვითაც არჩევნებში გაერთიანებული ოპოზიციის კანდიდატი, გრიგოლ ვაშაძე ლიდერობს.

 

გიორგი ვოლსკის თქმით, Edison Research ენმ-ის დაკვეთით მოქმედებს. მან ასევე აღნიშნა, რომ ოპოზიციური პარტია ცდილობს საზოგადოებაში ისე წარმოაჩინოს წინასაარჩევნო გარემო, რომ არჩევნების შედეგები გაყალბებულად წარმოაჩინოს.

 

„Edison Research-ის კვლევა არის პარტიული კვლევა, რომელსაც აქვეყნებს „ნაციონალური მოძრაობა“, ცდილობს, ხალხი დაარწმუნოს, რომ თუკი რაიმე მოხდა ისეთი ვთქვათ და რეალური შედეგი თუკი დაიდო, ეს იქნება Edison Research-ის მონაცემების გაყალბება და Edison Research პირდაპირ არის ენმ-ის შეკვეთით მოქმედი ორგანიზაცია,“ – განაცხადა გიორგი ვოლსკიმ.

 

Edison Research-ის ბოლო კვლევა და ხალხის განწყობა არჩევნების წინ. შეკითხვაზე ხვალ რომ არჩევნები ტარდებოდეს, ვის მისცემდით ხმას. პასუხები ასე ნაწილდება – გრიგოლ ვაშაძე 31, სალომე ზურაბიშვილი 16%, დავით ბაქრაძე 15%, შალვა ნათელაშვილი 7%, არ ვიცი 21%. გამოკითხვა 25 სექტემბრიდან 4 ოქტომბერის ჩათვლით მთელის საქართველოს მასშტაბით ჩატარდა და 3000 ადამიანი გამოიკითხა.

 

საგულისხმოა, რომ წინა კვლევასთან შედარებით შემცირდა „ქართული ოცნების“ კანდიდატის, სალომე ზურაბიშვილის მხარდაჭერა, თუკი წინა კვლევაში მას 20%-იან მხარდაჭერა ჰქონდა, ახლა ციფრი 16%-ზეა ჩამოსული.

 

შემცირებულია დავით ბაქრაძის მხარდამჭერთა რიცხვიც – 22-დან 15 % -მდე.