დღეს დილით ვანო მერაბიშვილი კლინიკიდან ისევ საპატიმროში დააბრუნეს. კონსილიუმის შემდეგ, სპეციალისტები სიმსივნურ პათოლოგიებს გამორიცხავენ

0
436
დღეს დილით ვანო მერაბიშვილი კლინიკიდან “ისევ საპატიმროში დააბრუნეს.  იგი  "მედიქლაბ ჯორჯიაში" ორი დღის განმავლობაში იმყოფებოდა.
ექიმის განმარტებით, მერაბიშვილის ჯანმრთელობის მდგომარეობა სტაბილურია და მისი კლინიკაში დატოვების საჭიროება აღარ არის.
კონსილიუმის შემდეგ, სპეციალისტები სიმსივნურ პათოლოგიებს გამორიცხავენ, ექიმები ჰორნერის სინდრომის გამომწვევი მიზეზის დადგენაზე მუშაობენ.
 
ვანო მერაბიშვილის ოჯახი და ადვოკატები მუშაობენ დიაგნოსტირებისა და მკურნალობის პროცესში უცხოელი სპეციალისტების ჩართვაზე, – ნათქვამია საქართველოს ყოფილი პრემიერ-მინისტრის ვანო მერაბიშვილის ადვოკატების განცხადებაში. მათივე ინფორმაციით, კონსილიუმმა ვერ მოახერხა საბოლოო დიაგნოზზე შეთანხმება, დღეის მდგომარეობით, ივანე მერაბიშვილს არანაირი მკურნალობა არ აქვს დანიშნული. განცხადებაში ნათქვამია; 
 
„საქართველოს ყოფილი პრემიერ-მინისტრის, ივანე მერაბიშვილის ჯანმრთელობის მდგომარეობის მკვეთრი გაუარესება დაიწყო 3 აგვისტოს, რის გამოც, მან მკურნალობის მოთხოვნით მიმართა სასჯელაღსრულების #9 დაწესებულების ექიმს. 3 აგვისტოს შემდეგ, ივანე მერაბიშვილს ადგილზე ჩაუტარდა 10-მდე სხვადასხვა გამოკვლევა და 5-ჯერ იქნა გადაყვანილი კლინიკებში დიაგნოსტიკაზე. აღსანიშნავია, რომ გამოკვლევების შედეგად, მისი დიაგნოზი მუდმივად იცვლებოდა და საბოლოოდ, 12 სექტემბერს მას დაუდგინეს ჰორნერის სინდრომი, თუმცა ექიმებმა ვერ მოახერხეს აღნიშნული სინდრომის გამომწვევი მიზეზების დადგენა. მიუხედავად აღნიშნული სინდრომის სიმძიმისა, ექიმებმა ივანე მერაბიშვილს მხოლოდ ყელის ფიქსატორის ტარების რეკომენდაცია მისცეს.
 
3 ოქტომბერს, კლინიკაში შეიკრიბა სხვადასხვა პროფილის ექიმებისგან შემდგარი კონსილიუმი, რომლის მიზანიც იყო დადგენილიყო ივანე მერაბიშვილის ჯანმრთელობის გაუარესების მიზეზები და დღეისთვის არსებული დიაგნოზი. განხილვის შედეგად, კონსილიუმი შეთანხმდა, რომ ივანე მერაბიშვილს დღეის მდგომარეობით აქვს ჰორნერის სინდრომი, თუმცა ექიმები ვერ შეთანხმდნენ აღნიშნული სინდრომის გამომწვევი მიზეზების თაობაზე და შესაბამისად დიაგნოზზე.
 
მიუხედავად ამისა, კონსილიუმის წევრები შეთანხმდნენ, რომ აღნიშნული სინდრომის ნიშნების გამოვლენიდან, მისი გამომწვევი მიზეზების დადგენისთვის საჭირო კვლევების ჩატარებამდე გავიდა დიდი დრო, რამაც შეუძლებელი გახადა მიზეზების დადგენა. აღნიშნული კვლევების დროულად ჩატარების შემთხვევაში, შესაძლებელი იქნებოდა ჰორნერის სინდრომის გამომწვევი მიზეზების დადგენა და შესაბამისი მკურნალობის დანიშვნა. ასევე, კვლევის დაგვიანებამ გაართულა შესაძლო ინტოქსიკაციის დადგენა.
 
გარდა ამისა, ექიმების ნაწილი თვლის, რომ შესაბამისი მკურნალობის არარსებობის შემთხვევაში, არსებული მდგომარეობა შესაძლოა გაცილებით გამწვავდეს და გადაიზარდოს მენინგიტში.
 
ვინაიდან კონსილიუმმა ვერ მოახერხა საბოლოო დიაგნოზზე შეთანხმება, დღეის მდგომარეობით, ივანე მერაბიშვილს არანაირი მკურნალობა არ აქვს დანიშნული.
 
ამჟამად, ვანო მერაბიშვილის ოჯახი და ადვოკატები მუშაობენ დიაგნოსტირებისა და მკურნალობის პროცესში უცხოელი სპეციალისტების ჩართვაზე“ – ნათქვამია განცხადებაში.
წინა სტატიათავდაცვის სამინისტრო უპრეცედენტო სკანდალში ეხვევა. საქართველოს შეირაღებული ძალებიდან ტყვია-წამალს უკანონოდ ყიდდნენ
შემდეგი სტატიავანო მერაბიშვილის ოჯახი საქმეში უცხოელი სპეციალისტების ჩართვას ითხოვენ
ტელეკომპანია ოდიშის საინფორმაციო სამსახური